У чацьвер а 18.00 у філіі літаратурнага музэю М.Багдановіча «Беларуская хатка» (вул.Рабкораўская, 18) мае адбыцца прэзэнтацыя драмы «Людвіка і Фабіян» пра каханьне Зоські Верас і Фабіяна Шантыра. Удзел бяруць аўтары – Людміла Рублеўская і Віталь Скалабан.
Упершыню п’есу «Людвіка і Фабіян» ставіў аматарскі калектыў на чале з магілёўскім рэжысэрам Валянцінам Ермаловічам у 2003 г. У друкаваным жа выглядзе яна пабачыла сьвет толькі ў 2006 г. Выдаў яе Віктар Хурсік, і гэта пасьля таго, што дагэтуль яе адмовіўся друкаваць адзін часопіс.
Валянцін Ермаловіч ахарактарызаваў гэты твор як п’еса-дакумэнт, дзеля таго, што ейны зьмест грунтуецца на сапраўдных фактах, узятых з архіўных крыніцаў.
Прэзэнтацыя мае прайсьці акуратна ў тым месцы, дзе часткова адбываліся падзеі п’есы.