Манаеў у ролі Кручкова.
«І расейцы, і палякі нам да дупы, нам да сракі»
У варшаўскім тэатры «Рампа» пры канцы кастрычніка Купалаўскі тэатр пакажа класічную п'есу Вінцэнта Дуніна-Марцінкевіча «Пінская шляхта». Для польскага гледача п'еса будзе агучана па-польску. Пра гэта паведаміў мастацкі кіраўнік тэатра Мікалай Пінігін.
«Палякі кажуць, што «Пінскай шляхтай» беларускі тэатр адкрывае ім імя яшчэ аднаго польскага класіка, — кажа Мікалай Пінігін. — Ды я на гэта адказваю: «Няхай так».
Ці не ганебна для Нацыянальнага акадэмічнага тэатра імя Янкі Купалы выступаць у тэатры «Рампа», а не на знакамітых сцэнах «Тэатра Народавага» і Ateneum'а?
«У нас карона не зваліцца, — кажа Пінігін. — Гэта ж наш першыя крокі на міжнароднай арэне, і думаю мы годна прадставім наш спектакль».
Прэм'ера класічнага фарс-вадэвіля «Пінская шляхта» ў пастаноўцы Пінігіна адбылася ў Купалаўскім у 2008 г. Ролю станавога прыстава Кручкова ў ім грае вядомы актор Віктар Манаеў. Рэжысёр зрабіў п'есу вельмі незалежніцкаю, калі пад заслону засцянковая шляхта з гонарам падымае свае радавыя гербы, а падчас п'есы гучаць прыпеўкі: «І расейцы, і палякі нам да дупы, нам да сракі».
