ЦВК зарэгістравала групу Цярэшчанкі 5

Цэнтрвыбаркам на пасяджэнні 20 верасня зарэгістраваў ініцыятыўную групу па вылучэнні кандыдатам на пасаду прэзідэнта Віктара Цярэшчанкі. Гэта першая зарэгістраваная ініцыятыўная група прэтэндэнта на пасаду кіраўніка дзяржавы на прэзідэнцкіх выбарах, якія адбудуцца 19 снежня.

У склад ініцыятыўнай групы Цярэшчанкі ўвайшло 1.300 чалавек.

У заяве ініцыятыўнай групы гаворыцца, што Віктар Цярэшчанка «здольны з`яднаць народ Беларусі для яго аўтарытэту, дабрабыту грамадзян». «Мы верым, што палепшацца і шляхі інтэграцыі з краінамі, у першую чаргу з Расійскай Федэрацыяй. Мы верым у цывілізаваныя эканамічныя і культурныя стасункі паміж дзяржавамі», — адзначаецца ў заяве.

Цярэшчанка Віктар Іванавіч нарадзіўся 30 студзеня 1950 г. у вёсцы Дуброўка (Краснапольскі раён Магілёўскай вобласці). Скончыў эканамічны факультэт Гомельскага дзяржаўнага ўніверсітэта і Міжнародны інстытут менеджменту.

Кандыдат эканамічных навук, член-карэспандэнт Міжнароднай акадэміі менеджменту і Міжнароднай інжынернай акадэміі (Масква), старшыня савета Асацыяцыі малога і сярэдняга прадпрымальніцтва.

З чэрвеня 1992 г. па чэрвень 1994 г.- генеральны дырэктар СТАА «Міжнародны інстытут менеджменту».

У 1994 г. вылучаўся кандыдатам на пасаду прэзідэнта, аднак вырашыў падтрымаць Аляксандра Лукашэнку, стаўшы яго даверанай асобай.

З жніўня па верасень 1994 г. — начальнік упраўлення па справах тэрыторый Адміністрацыі прэзідэнта.

З 1993 г. па 2004 г. — старшыня грамадскага аб`яднання «Народная дыпламатыя».

З 1994 г. па 2000 г. — старшыня Беларускай народнай партыі.

У 2001 г. Цярэшчанка ў другі раз вылучаўся кандыдатам на пасаду прэзідэнта. ЦВК адмовіла яму ў рэгістрацыі кандыдатам, прызнаўшы сапраўднымі толькі 62 тысячы подпісаў замест неабходных 100 тысяч.

Зараз беспартыйны. Жанаты, мае дзве дачкі.

Прыём заявак на рэгістрацыю ініцыятыўных груп па вылучэнні кандыдатаў на пост прэзідэнта пачаўся 15 верасня і будзе доўжыцца па 24 верасня ўключна.

Згодна з заканадаўствам збор подпісаў за вылучэнне кандыдата ў прэзідэнты будзе праходзіць з 30 верасня па 29 кастрычніка ўключна.

Акрамя Цярэшчанкі пра намер балатавацца на пасаду кіраўніка дзяржавы заявілі старшыня Ліберальна-дэмакратычнай партыі Сяргей Гайдукевіч, лідар грамадзянскай кампаніі «Гавары праўду!» Уладзімір Някляеў, лідар грамадзянскай кампаніі «Еўрапейская Беларусь» Андрэй Саннікаў, намеснік старшыні Партыі БНФ Рыгор Кастусёў, сустаршыня аргкамітэта па стварэнні партыі «Беларуская хрысціянская дэмакратыя» Віталь Рымашэўскі, намеснік старшыні Беларускай партыі «Зялёныя» Юрый Глушакоў і намеснік старшыні Аб`яднанай грамадзянскай партыі Яраслаў Раманчук.

Аляксандр Лукашэнка пакуль афіцыйна не абвясціў аб сваім удзеле ў выбарах.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ