У Беларусі створаны стабілізацыйны фонд на выпадак, калі цана расейскага газу ў наступным годзе будзе на ўзроўні сусьветнай, паведаміў кіраўнік Нацыянальнага банку Беларусі Пятро Пракаповіч.
Ён адзначыў, што ў фондзе не выкарыстоўваюцца сродкі з золатавалютных рэзэрваў краіны. «У фондзе прадугледжаныя выключна бюджэтныя сродкі. Наколькі мне вядома, сёньня ў фондзе ўжо больш за 100 мільярдаў беларускіх рублёў (50 мільёнаў даляраў)», - сказаў Пракаповіч.
Ён дадаў, што пры канцы году сродкаў у фондзе будзе значна болей.
Пракаповіч таксама лічыць, што павышэньне цаны на расейскі газ «…ніяк не адаб’ецца на экономіцы ў цэлым і на золатавалютных рэзэрвах краіны. Павелічэньне цаны на газ выкліча неабходнасьць ураду працаваць яшчэ ў больш напружаным рэжыме, нам належыць больш напружана працаваць над продажам беларускіх тавараў і паслугаў на экспарт», – сказаў ён.
Разам з тым Пракаповіч адзначыў, што беларускі бок разьлічвае, што павышэньне цаны на газ у саюзнай дзяржаве будзе ісьці па правілах, адзіных для Беларусі і Расеі.
«Цяпер адпрацоўваюцца любыя варыянты павышэньня кошту расейскага газу і ў сувязі з гэтым – магчымыя сцэнары ўплыву павелічэньня кошту на эканоміку», - сказаў Пракаповіч.
На сёньняшні дзень сярэдняя цана расейскага газу ў Эўропе складае 230 даляраў за 1000 кубамэтраў.
Фота photo.bymedia.net
