Аляксандра Мілінкевіча ў паездках па краю суправаджае невялікая група дарадцаў. На фота: Аляксандар Мілінкевіч у Баранавічах. Зьлева ад яго: Валер Мазынскі, Аляксей Янукевіч - адказны за арганізацыю паездак адзінага кандыдата, Павал Мажэйка - былы палітвязень, які выконвае функцыю прэс-сакратара.
Прайшло чатыры месяцы з часу абраньня Аляксандра Мілінкевіча адзіным кандыдатам ад дэмакратычных сілаў. Ці зьмяніла вялікая палітыка Мілінкевіча-чалавека? Ягоны сябар і іміджмэйкер, тэатральны рэжысэр Валер Мазынскі, кажа, што так.
"Наша Ніва": Што зьмянілася ў характары А.Мілінкевіча за чатыры месяцы?
Валер Мазынскі: З тэарэтыка адзіны пачаў ператварацца ў практыка. Пратаптаў нагамі не адзін дзясятак кілямэтраў рэгіянальных сьцежак. Гэта надало яму больш адчуваньня тых праблемаў, якімі жывуць людзі, а яшчэ ў большай ступені дапамагло знаходзіць тыя аргумэнты ў размовах зь людзьмі, якія маглі б зьнішчыць ўплыў замбаваньня, якім пакрыла Беларусь лявіна дзяржаўных СМІ. Знаёмствы з рэчаіснасьцю яго ў добрай ступені раззлавалі. Прысутнасьць у яго характары выхаванасьці, такту, інтэлігентнасьці - якасьцяў, якія ня надта ўхваляюцца электаратам Лукашэнкі, паступова пачынае афарбоўвацца новымі "колерамі": воляю, рашучасьцю, атакаваньнем, у добрым сэнсе жорсткасьцю.
"НН": А ці пасуе яму гэтая жорсткасьць?
ВМ: Пасуе ці не пасуе, але жорсткасьць будзе разьвівацца ў Аляксандру Мілінкевічу ў той ступені, у якой ён будзе пранікацца рэчаіснасьцю, паглыбляцца ў праблемы грамадзтва. Болевы парог у яго будзе паніжацца, і гэта ўжо заўважна. Іншым разам яго ўжо даводзіцца нават і стрымліваць.
"НН": Вы шмат езьдзілі з сп.Аляксандрам па рэгіёнах. У якіх умовах ён лепш пачуваецца?
ВМ: Калі ён бачыць запалоханыя вочы, калі людзі відавочна яго пазнаюць, але баяцца падысьці - ён пачуваецца няўтульна. А вось калі падыходзяць людзі, пазбаўленыя страху, пытаюцца, крытыкуюць, спадар Аляксандар з задавальненьнем ідзе на размову з такім чалавекам як з роўным. З рабом жа заўсёды пачуваесься няўтульна. На рынках вольных людзей болей. На прадпрыемствах, у ВНУ - болей тых, хто баіцца.
"НН": Чаго сп.Мілінкевічу яшчэ бракуе?
ВМ: Вялікай аўдыторыі, сталічнай энэргетыкі. А гэта - толькі практыка. Палітык заўсёды нараджаецца са штодзённага кантакту зь людзьмі. У тэорыі ён засыхае. Таму ўлады й баяцца пускаць адзінага ў народ, да людзей. У невялікіх гарадах гэбэшнымі камэрамі людзей лягчэй запалохаць, у адносінах са сталічным жыхаром гэта не спрацуе. Ягоны выхад да менчукоў мусіць адбыцца ў першыя ж дні агітацыйнай кампаніі. Яго трэба кідаць у народ. І Мілінкевіч да гэтага гатовы.
Фота Юліі Дарашкевіч
