Някляеў пералічыў ганарар за кнігу пацярпелым ад аварыі на «Пінскдрэве» 6

Прэтэндэнт на пасаду прэзідэнта Беларусі, лідар кампаніі «Гавары праўду!» Уладзімір Някляеў пералічыў частку свайго ганарару за кнігу вершаў на рахунак дапамогі пацярпелым ад аварыі на «Пінскдрэве».

Пра гэта паведаміла прэс-сакратар Някляева Юлія Рымашэўская.

Дабрачынны рахунак, куды можна пералічваць сродкі ў дапамогу сем’ям загінулых і пацярпелым ад выбуху на заводзе «Пінскдрэў-ДСП», адкрыты Пінскай епархіяй і Пінскім гарадскім саветам дэпутатаў. «Някляеў сёння пералічыў на гэты рахунак тры мільёны рублёў — частку ганарару за кнігу вершаў», — сказала Рымашэўская.

Паводле слоў самога палітыка, «гэта — кропля ў моры». «Але ўсё ж, я пералічваю на разліковы рахунак частку свайго ганарару за апошні зборнік вершаў. Я заклікаю ўсіх неабыякавых дапамагчы па меры магчымасці пацярпелым у Пінску. Можа быць, наша грамадзянская салідарнасць стане прыкладам для тых, хто не палічыў патрэбным абвясціць нацыянальную жалобу. Мы не можам навучыць нашу дзяржаву дзейнічаць паводле прынцыпаў маралі, але мы можам дапамагчы тым, у чые сем’і прыйшлі гора і смерць», — сказаў Някляеў.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ