У Беларусі за апошнія гады хакей дасягнуў значных посьпехаў. Варта толькі адзначыць чацьвёртае месца на алімпіядзе-2002 у Солт-Лэйк-Сыты, а таксама шостае месца на сёлетнім чэмпіянаце сьвету ў Рызе, каб праілюстраваць гэты заўважны скачок.
Нацыянальнае першынство Беларусі па хакеі стала таксама досыць прывабным відовішчам. Замест чатырох паўжабрацкіх клюбаў, якія гулялі ў беларускім чэмпіянаце ў 90-ыя гады, сёньня мы маем дзесяць паўнавартасных камандаў, якія стаяць цьвёрда на нагах. Не за гарамі ўжо і стварэньне новай каманды ў Бабруйску. У беларускім першынстве гуляе адзіная прафэсіянальная ўкраінская каманда – кіеўскі «Сокал», да нядаўняга часу таксама гулялі і два латыскія клюбы «Рыга-2000» і «Мэталюрг» (Лібава). Гэтаму, натуральна, паспрыяла ўрадавая праграма дапамогі хакейным клюбам. Прадпрыемствы, што фінансуюць хакейныя клюбы, маюць ільготнае падаткаабкладаньне.
Бяда толькі ў тым, што сярод усіх гульнявых відаў спорту менавіта хакей мае найменш разьвітую сыстэму эўракубкаў. Такіх практычна няма. Таму і нашыя клюбы гады ў рады могуць праверыць сваю сапраўдную сілу ў супрацьстаяньнях з камандамі зь іншых чэмпіянатаў. Адзінай такой магчымасьцю зьяўляецца Кантынэнтальны Кубак. Сёлета паўфінал гэтага турніру прымае Менск.
У Палацы спорту (пр.Пераможцаў,4) на працягу ўік-энду будуць спаборнічаць менскае «Юнацтва», украінскі «Сокал», аўстрыйскі «Рэд Бул» і казаскі «Казахмыс». Толькі адна каманда зможа выйсьці ў фінальны раўнд, які пройдзе 5-7 студзеня ў вугорскім Сэкешфэхервары. Месцы ў фінале Кантынэнтальнага Кубку ўжо забранявалі сабе гаспадары «Альба Волан», расейскі «Авангрд» і фінскі «Ільвес».
У 2004 годзе беларускі клюб «Гомель» у розыграшы Кантынентальнага Кубку заняў другое месца, прайграўшы ў фінале славацкаму «Зволену». Гэтае дасягненьне зьяўляецца найвышэйшым у гісторыі ўдзелу беларускіх клюбаў у эўракубках.
Сёлета «Юнацтва» рашуча настроена паўтарыць ці нават пераўзысьці той вынік «Гомелю». Нам жа застаецца толькі падтрымліваць каманду. Усе матчы «Юнацтва» будуць пачынацца а 18:30. Кошт квіткоў – 4000 рублёў.
Расклад гульняў менскага «Юнацтва»:
17 лістапада «Юнацтва» – «Рэд Бул»
18 лістапада «Юнацтва» – «Сокал»
19 лістапада «Юнацтва» – «Казахмыс»
Фота Андрэя Лянкевіча
