Мікалай Бамбіза — усё ж адстаўка

Генеральны дырэктар Нацыянальнага парка «Белавежская пушча» Мікалай Бамбіза адпраўлены ў адстаўку. Інфармацыя пра гэта з’явілася на сайце «Нашай Нівы» яшчэ ў панядзелак, але два дні не мела афіцыйнага пацверджання. Тым не менш учора Бамбіза развітаўся з калектывам і пакінуў пасаду.

Паводле інфармацыі «Турізм і отдых», новае месца працы Бамбізы звязана з «Белаграпрамбанкам». Выконваючым абавязкі дырэктара прызначаны намеснік па ідэалогіі Аляксандр Зоцікавіч Шарында.

Кар’ерны ўзлёт чыноўніка пачаўся ў 1989 годзе, калі 35-гадовы Бамбіза быў абраны дырэктарам Прыпяцкага дзяржаўнага ландшафтна-гідралагічнага запаведніка. Кіраўнік запомніўся тым, што актыўна развіваў паляўнічы турызм і лабіраваў адстрэл жывёлаў у запаведніку. Неўзабаве мясціны забрала пад сваю апеку Кіраўніцтва справамі прэзідэнта, а ў кастрычніку 1996 года запаведнік быў рэарганізаваны ў нацыянальны парк. Яшчэ праз год на мяжы парка было пабудавана дрэваперапрацоўчае прадпрыемства.

У 2000 годзе Бамбіза вырашыў ісці ў дэпутаты і нечакана… праваліўся на выбарах.

Пра самадурства Бамбізы ходзяць легенды. Вось якое ўражанне склалася ў аднаго з расійскіх падарожнікаў пасля размоў з мясцовымі жыхарамі:

«Напрыклад, Мікалай Бамбіза выдаў пастанову, паводле якой мясцовыя жыхары не могуць без яго персанальнага дазволу прадаць сваё прыватнае жыллё. Паходы за грыбамі і ягадамі таксама строга рэгламентаваныя: Бамбіза падзяліў лес на квадраты і замацаваў іх за населенымі пунктамі. Гэта значыць дзе табе прадпісана, там і збірай дарункі прыроды, а ступіць налева-направа — нават не думай!

Распавядалі і пра тое, як Бамбіза ставіцца да свайго прозвішча.

Калі ў якой-небудзь заяве мясцовага жыхара пішуць: „Ад вось такога і вось такога дырэктару НП БП Бамбізе“ [Бамбіза, па-беларуску, — лаянкавае слова на высокага, вялікага чалавека, ужываецца ў негатыўным сэнсе»], ён проста рве дакумент, не чытаючы далей — маўляў, скланяць маё прозвішча нельга»

Клан Бамбізаў адзін з самых моцных «сямейных падрадаў» у беларускай уладзе. Родны брат, Сцяпан Бамбіза, дырэктар Прыпяцкага Нацыянальнага парка. Яшчэ вышэй пайшоў стрыечны брат. Іван Бамбіза быў прэзідэнтам «Белнафтахіма» (1997–2004) і віцэ-прэм’ерам (2004–2010)

• 0
• 0
• 0
• 0
• 0
• 0
• 0
• 0