Не менш за 35 чалавек загінулі. Сілавікі мелі інфармацыю пра тэракт за тыдзень, але не здолелі выявіць тэрарыстаў.
Відэа drugoi.livejournal.com
Міліцыя заяўляе, што гэта тэракт, які здзейсніў тэрарыст-смяротнік. Выбух адбыўся ў зоне выдачы багажу непасрэдна каля стужак-транспарцёраў, г.зн. да праходжання мытнага кантролю.
Бомба магутнасцю да сямі кілаграмаў трацілу была начыненая металічнымі элементамі.
Тэрарыст прайшоў у залу, дзе чакаюць міжнародныя рэйсы, і знаходзіўся ў вельмі шчыльным натоўпе людзей, таму многія атрымалі цяжкія траўмы.
Маскоўская міліцыя шукае трох падазраваных мужчын.
Ад 15 гадзін дня ў аэрапорце зрабілі пасадку міжнародныя рэйсы з Каіра (у 15:07), Токіа (15:18), Дзюсэльдорфа (15:52), Лондана (16:35), Хашыміна (16:49). Выбух адбыўся а 16:37.
Некалькі рэйсаў, якія павінны былі прызямліцца ў "Дамадзедава", затрымліваюцца. Час затрымкі афіцыйна не паведамляецца. Аэрапорты "Унукава" і "Шарамецьева" працуюць у рэжыме пагрозы тэракта.
У Твітэры жыхары Масквы заклікаюць неадкладна выехаць у "Дамадзедава" на асабістым транспарце, каб дапамагчы развезці пасажыраў аэрапорта па хатах.
Прэзідэнт Расіі Мядзведзеў правёў экстраную нараду ў сувязі з тэрактам.
Паводле паведамленняў афіцыйнага інфармацыйнага агенцтва БелТА, беларусаў сярод загінуўшых і пацярпелых ьу Дамадзедава няма.
