Кампаньёны (Prairie Home Companion)
ЗША, 2005, каляровы, 100 хв.
Жанр: Драма
Адзнака: 6,5 (з 10)
Карціна «Кампаньёны», якая дэманструецца на нашых экранах стала апошнім фільмам кінаклясыка Робэрта Олтмэна, які памёр на мінулым тыдні. Олтмэн праславіўся трагікамічным гратэскам «Перасоўны ваенна-палявы шпіталь», сацыяльна-крытычным «Нэшвілам» і жорсткаю апрацоўкаю вэстэрна «Мак-Кэйб і місіс Мілер». З апошніх твораў Олтмэна – «Гатовае адзеньне» пра высокую моду – і «Гулец» – пра норавы Галівуду.
Олтмэнаўскі стыль – адмысловы. Гэта трапныя скрыжаваныя дыялёгі, атмасфэра бурлеску – і праўды, сацыяльная крытыка – і выкшталцоная акторская гульня. Найлепшыя зоркі біліся за права працаваць з Робэртам Олтмэнам – і часам здымаліся ў ягоных аўтарскіх драмах за сымбалічныя грошы.
У карціне «Кампаньёны» – Ўудзі Гарэлсан і Мэрыл Стрып, Томі Лі Джонз і Гарысан Кейлар.
Фільм «Кампаньёны» мае ўсе прыкметы олтмэнаўскага стылю. 50-ыя гады. Апошняе радыёшоў. Акторы выкладаюцца напоўніцу, а за кулісамі віруе жыцьцё...
Каўбоі-сьпевакі зь непрыстойнымі кпінамі, дзяўчына, якая баіцца выступаць на сцэне і нават прывід, які не жадае дараваць радыёжартаў.
Усё зьмяшалася на гэтай сцэне, настальгія, жыцьцё, сьмерць – гэта «Вішнёвы сад» па-амэрыканску. І балючае разьвітаньне Робэрта Олтмэна.
