Лукашэнка мяняе базу

Дасьледчы цэнтар Інстытуту прыватызацыі і мэнэджмэнту было правёў апытаньне, каб высьветліць стаўленьне беларусаў да каштоўнасьцяў рынкавай эканомікі. Рэспандэнтам прапаноўвалася адказаць на цэлы шэраг пытаньняў, зьвязаных з гэтай тэмай. Некаторыя вынікі даюць прасторы для значных роздумаў.

Вельмі паказальным зьяўляецца пытаньне аб сярэдніх заробках насельніцтва: 25% атрымліваюць менш за 100 даляраў, 32% -- ад 100 да 150 даляраў, па 22% ад 150 да 200 даляраў і 21% -- звыш 200.

Найбольш забясьпечанымі зьяўляюцца жыхары Менску і буйных гарадоў. Толькі траціна апытаных можа дазволіць сабе якасную ежу і вопратку. Разам з тым 40% можа набыць сабе патрыманы ці новы аўтамабіль, а кватэру ў стане набыць 12% насельніцтва.

Чвэрць насельніцтва апроч асноўнай працы мае яшчэ і падпрацоўкі. Адпаведна вынікам апытаньня найбольш мабільнымі і актыўнымі, што датычыць падпрацовак, зьяўляюцца вайскоўцы і міліцыянты, а таксама мэнэджэры сярэдняга і вышэйшага зьвяна.

40% апытаных кажа, што не адчувае нічога новага ў цяперашняй эканамічнай сытуацыі, чвэрць кажа пра тое, што даводзіцца «круціцца», каб забясьпечыць родным годнае жыцьцё, 17,8% выкарыстоўвае сытуацыю, каб дабіцца ў жыцьці большага. Толькі 4,3% ніяк ня могуць прыстасавацца да сёньняшніх рэаліяў.

Жыхары вёсак і малых раённых гарадкоў лічаць, што бліжэйшым часам іхняе жыцьцё ніякім чынам ня зьменіцца. Тое ж думаюць і менчукі. Затое насельнікі буйных і абласных гарадоў лічаць, што іх чакаюць зьмены да лепшага. Да горшага ва ўсіх населеных пункатах рыхтуецца ад 5,5 да 9,5% насельнікаў. Трэба адзначыць, што апытаньне праводзілася ў ліпені, таму насельніцтва не адрэагавала на магчымае павышэньне коштаў на газ.

Што цікавае, беларусаў больш за эканамічныя праблемы хвалююць сацыяльныя кшталту п’янства.

Людзі старэйшага веку найперш думаюць, што эканамічнае становішча ў краінах Балтыі горшае за беларускае, моладзь у сваю чаргу мае адваротнае меркаваньне.

Жыхары Менску лічыць найбольш эфэктыўнай эўрапейскую мадэль эканамічнага разьвіцьця, а вось насельнікі вёсак, раённых і абласных гарадоў выказваюцца за такі тып, які існуе зараз у Беларусі, называючы яго найбольш эфэктыўным.

Вера насельніцтва ў тое, што ў краіне праводзяцца рынкавыя рэформы, залежыць ад заробку апытаных. Чым ніжэйшы заробак, тым большая вера і наадварот. 81% насельнікаў лічаць, што Беларусі неабходныя рынкавыя пераўтварэньні

Абсалютная большасьць рэспандэнтаў незалежна ад заробку лічаць, што за апошнія гады Беларусь дасягнула большых посьпехаў у эканамічнай сфэры за суседнія краіны.

Толькі 31% рэспандэнтаў лічыць, што Беларусь і Расея мусяць стварыць саюзную дзяржаву з адной валютай, парлямэнтам і прэзыдэнтам, яшчэ менш – 29%, выказваюцца за тое, каб Беларусь увайшла ў склад Расеі. Разам з тым 55% апытаных выказваецца за тое, каб Беларусь увайшла ў Эўрасаюз, але столькі сама рэспандэнтаў лічаць, што ўрады заходніх краінаў перашкаджаюць разьвіцьцю беларускай эканомікі.

Прыхільнікаў пераменаў найбольш сярод прадстаўнікоў маладога і сярэдняга пакаленьняў – да траціны. Цікава, што найбяднейшыя пласты насельніцтва зьяўляюцца прыхільнікамі рынкавых рэформаў ці цясьнейшай інтэграцыі з Расеяй, а найбацейшыя падтрымліваюць цяперашні курс краіны, але выступаюць супраць інтэграцыі з Расеяй. Такім чынам адбываецца зьмена асноўнай электаральнай базы дзейснага прэзыдэнта.

Навінам тэлебачаньня і іншых дзяржаўных СМІ найперш давяраюць у невялікіх населеных пунктах, з павелічэньнем колькасьці насельніцтва ў горадзе павышаецца адпаведна і давер да Інтэрнэту і незалежных выданьняў.

Толькі кожны пяты рэспандэнт штодня карыстаецца Інтэрнэтам. 48% ім увогуле не карыстаецца, а 17% ня ведаюць, што гэта такое.

• 0
• 0
• 0
• 0
• 0
• 0
• 0
• 0