Міхалевіч атрымаў палітычны прытулак у Чэхіі 18

Экс-кандыдат у прэзыдэнты Алесь Міхалевіч атрымаў палітычны прытулак у Чэхіі.

Крыніца, якая паведаміла радыё «Свабода» гэтую інфармацыю, таксама паведаміла, што заўтра ён атрымае адпаведныя дакументы.

Алесь Міхалевіч з’яўляецца абвінавачаным па справе аб падзеях 19 снежня. 19 лютага яго выпусьцілі зь СІЗА КДБ пад падпіску аб нявыездзе. Пасля гэтага Міхалевіч заявіў пра катаванні ў следчым ізалятары КДБ, а таксама пра тое, што ён разарваў дамову аб супрацоўніцтве з КДБ, якую вымушана падпісаў перад тым як выйсці з ізалятара на падпіску пра нявыезд.

Ноччу 14 сакавіка ў сваім блогу Міхалевіч аб’явіў, што знаходзіцца «не ў зоне дасягальнасці беларускага КДБ».

Рух «За Свабоду» паведаміў, што яму ўдалося ноччу выехаць з краіны, дарога ў «надзейнае месца» заняла суткі. Сям’я засталася ў Менску. «Для мяне існуе адзіная прычына, якая апраўдвае такія мае крокі, — гэта рэальная фізічная пагроза, — заявіў экс-кандыдат у прэзідэнты. — Усе бачаць, што гэтыя людзі гатовы пайсці на ўсё, у іх дзеяннях няма законнасці і адкрытасці.

Пазней міністар замежных спраў Карэл Шварцэнбэрг заявіў, што Міхалевіч папрасіў палітычнага прытулку ў Чэскай Рэспубліцы.

А. Міхалевіч пацвердзіў інфармацыю пра атрыманне палітычнага прытулку электроннай поштай сваёй жонцы Мілане. «Хацеў напісаць табе, што атрымаў прытулак, але прачытаў гэта на сайце „Нашай Нівы“», — працытавала ліст Мілана Міхалевіч.

СМ

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ