Асуджанаму па справе аб масавых беспарадках расіяніну Арцёму Брэусу не прадоўжылі рэгістрацыю па адрасе пражывання, паведамляюць праваабаронцы.
Грамадзянін Расіі быў зарэгістраваны па адрасе сваёй бабулі ў Мінску.
У адпаведнасці з беларускім заканадаўствам без рэгістрацыі грамадзянін іншай краіны не можа атрымаць від на жыхарства. Рэгістрацыя і пастаяннае пражыванне ў краіне дазваляюць з часам атрымаць беларускае грамадзянства.
Нагадаем, што 10 сакавіка суддзя Маскоўскага раёна Мінска Любоў Сімахіна прыгаварыла Брэуса і яшчэ аднаго расіяніна Івана Гапонава да штрафу ў памеры 300 базавых велічынь (10,5 млн. рублёў) кожнага. Яны былі вызваленыя ў зале суда пад падпіску аб нявыездзе.
Расіяне прызнаныя вінаватымі ў актыўным удзеле ў масавых беспарадках, якія суправаджаліся пагромамі, узброеным супраціўленні прадстаўнікам улады і нанясенні пашкоджанняў супрацоўнікам міліцыі (частка 2 артыкула 293 КК).
