Жонку палітвязня Аляксандра Атрошчанкава Дар’ю Корсак ваенная пракуратура 10 чэрвеня не апытала па катаваннях у СІЗА КДБ. «Яны адмовілі мне ў прысутнасці прадстаўніка», — паведаміла «Беларускаму партызану» Дар’я Корсак. Дар’я прыйшла ў ваенную пракуратуру разам з праваабаронцай Аленай Танкачовай.
Дар’я Корсак пойдзе ў пракуратуру на наступным тыдні з адвакатам, а вось Алену Танкачову апыталі сёння. «Танкачова дала тлумачэнні. Яна прыйшла са мной, ёй сказалі, што калі ёсць што сказаць па справе, хай гаворыць асобна. Яна і нагаварыла», — паведаміла Д. Корсак.
«Яна бачыла ў Празе Міхалевіча; была на судзе ў Саннікава, калі той рабіў заяву аб катаваннях. Яны таксама збіраюцца ехаць і апытваць Атрошчанкава ў калоніі і Саннікава ў СІЗА», — паведаміла жанчына.
2 сакавіка 2011 г. Атрошчанкаў быў прызнаны вінаватым ва ўдзеле ў так званых «масавых беспарадках» і асуджаны да
На судзе А. Атрошчанкаў пацвердзіў інфармацыю аб прымяненні катаванняў у СІЗА КДБ. 4 сакавіка Дар’я Корсак накіравала генеральнаму пракурору «Заяву аб прымяненні катаванняў і жорсткім, нялюдскім і прыніжаючым чалавечую годнасць абыходжанні ў СІЗА КДБ».
«З 20 снежня 2010 года па гэты дзень, мой муж, Аляксандр Сяргеевіч Атрошчанкаў, знаходзіцца ў СІЗА КДБ. Такім чынам, перыяд часу, апісаны Міхалевічам, прыйшоўся і на ўтрыманне майго мужа.
1 сакавіка 2011 на судовым працэсе, у мяне была кароткая магчымасць перагаварыць з мужам, і ён пацвердзіў, што гэтак жа падвяргаецца катаванням і жорсткаму бесчалавечнаму абыходжанню ў СІЗА КДБ.
Больш падрабязную інфармацыю я даведалася пасля вынясення Аляксандру прысуду 2 сакавіка 2011 года. Яму ўдалося паведаміць, што яго так жа прымушаюць распранацца, ставяць у такім выглядзе „на расцяжку“ на працяглы час, што дастаўляе яму моцныя фізічныя пакуты, больш таго, у распранутым выглядзе яго прымушаюць рабіць фізічныя практыкаванні, ён не паспеў паведаміць да чаго прыводзіць адмова падпарадкоўвацца такога роду загадам, але ён даў зразумець, што санкцыі за невыкананне такога роду зневажальных і хваравітых дзеянняў могуць быць самымі жорсткімі. Гэтак жа мне стала вядома, што тыя ж асобы ў масках неаднаразова праводзілі балючыя маніпуляцыі з кайданкамі ў адносінах да майго мужа.
Акрамя гэтага, першы час, Атрошчанкаву прыходзілася знаходзіцца ў СІЗА КДБ без спецыяльнага спальнага месца і да гэтага часу ён знаходзіцца ў камеры без спецыяльна абсталяванага санітарнага вузла, што гэтак жа лічу жорсткім і бесчалавечным і зневажаючым чалавечую годнасць абыходжаннем».
Дар’я Корсак прасіла «тэрмінова правесці праверку выкладзеных фактаў, а таксама апытаць майго мужа, і асобаў, якія ўтрымоўваліся з ім у адных камерах у прыватным парадку, і спосабам, які мог бы выключыць ціск з боку адміністрацыі СІЗА КДБ і далейшыя рэпрэсіі супраць іх; прыняць меры пракурорскага рэагавання; паведаміць аб выніках праверкі ва ўстаноўленыя законам тэрміны».
