Кыргызстан настойвае на экстрадыцыі Бакіева 4

Парламент Кыргызстана запатрабаваў ад Генеральнай пракуратуры, Дзяржкамітэта нацыянальнай бяспекі і МУС прыняць меры для затрымання былога прэзідэнта Курманбека Бакіева і яго набліжаных.

У адпаведнай пастанове парламента сілавым ведамствам даручана «прыняць вычарпальныя меры па вышуку, затрыманні і экстрадыцыі ў рэспубліку былога прэзідэнта Курманбека Бакіева, а таксама яго сыноў — Бакіевых Марата і Максіма, былога прэм’ер-міністра Даніяра Усенава, былога кіраўніка сакратарыята прэзідэнта Аксаны Маляванай, былога кіраўніка адміністрацыі прэзідэнта Жароева, былога старшыні Службы дзяржаўнай аховы Жаныша Бакіева, былога старшыні Дзяржаўнай службы нацыянальнай бяспекі Мурата Суталінава».

Курманбек Бакіеў, звергнуты з пасады прэзідэнта Кыргызстана ў выніку народных хваляванняў 19 красавіка 2010 года, прыбыў у Беларусь з неафіцыйнай жонкай і двума дзецьмі. Паводле неафіцыйнай інфармацыі, ён дагэтуль знаходзіцца ў Беларусі.

У сябе на радзіме Курманбек Бакіеў абвінавачваецца ў службовых злачынствах і саўдзеле ў масавых забойствах. Улады Кыргызстана двойчы звярталіся ў Генеральную пракуратуру Беларусі з просьбай аб выдачы Бакіева і двойчы ім адмаўлялі. У Мінску заявілі, што не знаходзяць прававых падстаў для задавальнення просьбы аб выдачы.

У Мінску Бакіеў правёў некалькі прэс-канферэнцый, падчас якіх заявіў пра сваю невінаватасць, выказаў удзячнасць Лукашэнку за дапамогу і падкрэсліў, што пакуль не мае намеру вяртацца ў Кыргызстан.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ