У Беларусі закрыты для купання 22 вадаёмы, у пяці вадаёмах уведзены абмежаванні на купанне дзяцей.
Пра гэта паведаміла загадчыца аддзялення камунальнай гігіены Рэспубліканскага цэнтра гігіены, эпідэміялогіі і грамадскага здароўя Ірына Жаўняк 15 ліпеня на
Усяго ў Беларусі функцыянуюць 567 афіцыйных пляжаў. Санітарныя службы забаранілі выкарыстанне сямі зон адпачынку ў Брэсцкай вобласці: пляжаў на вадаёме паблізу ад дзіцячага аздараўленчага лагера «Чайка» (Ляхавіцкі раён) і санаторыя «Надзея» (Жабінкаўскі раён), каля ракі Шчара ў вёсцы Дарава Ляхавіцкага раёна, каля ракі Ведзьма ў Ляхавічах, каля возера аграгарадка Хмелева Жабінкаўскага раёна, а таксама каля ракі Чаква вёскі Рубель Столінскага раёна і вадасховішча Жабер Драгічынскага раёна.
Сем зон адпачынку закрыты для купання ў Полацкім раёне Віцебскай вобласці: каля азёраў Гомель, Шчаты, Янава, Суя, Лясное, Школьнае (у вёсцы Быкоўшчына) і Скобрае (вёска Казімірава).
Забаронена выкарыстоўваць шэсць зон адпачынку ў Гомельскай вобласці: пляж «Унікам» каля ракі Дняпро ў Жлобіне, возера Святое ў Рагачоўскім раёне, акваторыі на левым беразе ракі Прыпяць у Мазырскім раёне ад аўтамоста да рэчышча ракі Мерлявіца і ў раёне рэкрэацыйнай зоны санаторыя «Сосны», а таксама азёр Вірскае і Сырскае Мазырскага раёна.
У Магілёўскай вобласці вынесена забарона на купанне ў рацэ Даўжанка (вёска Доўгае Клічаўскага раёна) і возеры Аўсянка (Горацкі раён).
Купанне дзяцей не рэкамендуецца ў возеры Юбілейнае ў Гродне; у Гомельскай вобласці — у возеры Камарына і на гарадскім пляжы Дняпра ў Рагачове, а таксама ў возеры Святое; у Віцебскай вобласці — у кар’еры Шчацінка ў Оршы і Аршанскім раёне, рацэ Дняпро ў межах Оршы. У гэтых вадаёмах перавышэнне ўтрымання бактэрый выяўлена адзін раз.
Як зазначыла Жаўняк, сітуацыя з забаронай на купанне сёлета практычна не адрозніваецца ад леташняй. Паколькі колькасць бактэрый павялічваецца ў цёплае надвор’е, спецыялісты прагназуюць, што з наступленнем спякоты пералік вадаёмаў, закрытых для купання, павялічыцца.
Грамадзяне, якія парушаюць забарону на купанне, рызыкуюць заразіцца кішэчнай інфекцыяй, асабліва калі выпадкова заглытнуць ваду. У сувязі з гэтым спецыяліст падкрэсліла: вада ў адкрытых вадаёмах не прызначна для піцця, у ёй таксама не варта мыць рукі і садавіну.
Між тым Жаўняк паведаміла, што сувязі паміж выпадкамі заражэння кішэчнымі інфекцыямі і купаннем сёлета, як і летась, у Беларусі не выяўлена.