Экспарт беларускіх нафтапрадуктаў за пяць месяцаў павялічыўся на 51,5% 2

За студзень-май 2011 года Беларусь павялічыла экспарт нафтапрадуктаў на 51,5% у параўнанні з аналагічным леташнім перыядам.

Як паведамляе Белстат, за пяць месяцаў за межы краіны экспартавана 5 млн. 764,7 тыс. тон нафтапрадуктаў, з іх у краіны СНД — 1 млн. 75,9 тыс. тон (рост на 41%), па-за СНД — 4 млн. 688,8 тыс. тон (рост на 54,1%).

Што тычыцца імпарту нафтапрадуктаў, то за пяць месяцаў ён павялічыўся ў 4,7 разу да адпаведнага перыяду 2010 года і склаў 1 млн. 524,6 тыс. тон.

Згодна з данымі Белстата, павялічыліся таксама аб’ёмы вытворчасці нафтапрадуктаў. У першым паўгоддзі беларускімі НПЗ выраблена 1 млн. 427, 3 тыс. тон аўтамабільных бензінаў, што на 7,8% больш, чым за такі ж перыяд 2010 года. Дызельнага паліва за студзень-чэрвень выраблена амаль 3 млн. тон (рост на 25,8%), топачнага мазуту — 2 млн. 542,2 тыс. тон (рост на 19,9%). Разам з тым на 6,2% скарацілася вытворчасць масла змазачнага.

Імпарт нафты за пяць месяцаў узрос на 45,2% і склаў 7 млн. 686,1 тыс. тон. Пры гэтым экспарт нафты з Расіі павялічыўся на 32,1% — да 6 млн. 890 тыс. тон.

Андрэй Кажамякін, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ