На мяжы Беларусі і Латвіі ўзмоцнены кантроль за правозам паліва

Як паведамілі ў прэс-цэнтры Дзяржаўнага пагранічнага камітэта Беларусі, апрача таго што беларускі бок абмежаваў магчымасць выезду з краіны гэтак званых «бензавозаў», пра ўзмацненне кантролю ў пунктах пропуску дамовіліся і Дзяржаўная пагранічная служба, Служба дзяржаўных даходаў і Служба бяспекі дарожнага руху Латвіі.

Асаблівая ўвага з боку кантрольных органаў будзе скіравана на выяўленне аўтамабіляў, у бензабаках якіх зроблены канструкцыйныя змяненні. Падазроныя аўтамабілі пройдуць поўную праверку на адпаведнасць тэхнічным параметрам.

Раней было ўстаноўлена, што ў летні час да 70% грамадзян, якія перасякаюць мяжу ў пунктах пропуску «Церахава» і «Грэбнева», складаюць жыхары прыгранічнай зоны. Іх галоўная мэта — перавозка паліва. Паводле падлікаў Службы дзяржаўных даходаў Латвіі, доля нелегальнага рынку аўтамабільнага паліва складае ў краіне ўжо 15%.

Вынікі распачатай аперацыі стануць магчымай падставай для ўнясення зменаў у закон «Аб акцызным падатку», якім будзе дазволена перавозка паліва не часцей за адзін раз на тыдзень, а не раз на некалькі гадзін, як адбываецца зараз. Такая практыка абмежаванняў раней была ўведзена ў суседніх краінах.

Так, у Літве паліва дазваляецца правозіць не больш як пяць разоў на месяц, а за кожную наступную перавозку трэба плаціць падатак. У Беларусі вываз паліва часцей за адзін раз на пяць дзён магчымы таксама пры ўмове мытнага дэкларавання і выплаты мытных плацяжоў.

Вячаслаў Будкевіч, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ