ААН і Курэйчык здымуць беларускі маладзёжны серыял 18

Беларускі офіс Праграмы развіцця ААН (ПРААН) абвясціў аб планах зняць васьмісерыйны маладзёжны мастацкі фільм.

Стужка пад назвай «Вышэй за неба» стане першым маладзёжным серыялам, знятым у Беларусі. Паводле слоў спецыяліста ПРААН Марыі Маліноўскай, серыял здымаецца ў мэтах рэалізацыі гранту Глабальнага фонду для барацьбы са СНІДам, туберкулёзам і малярыяй і ў супрацоўніцтве з Міністэрствам аховы здароўя Беларусі. Адной з галоўных мэтаў праекта з’яўляецца прадухіленне дыскрымінацыі людзей, якія жывуць з ВІЧ, і прафілактыка ВІЧ-інфекцыі ў Беларусі.

Шматсерыйны фільм закліканы разбурыць шэраг стэрэатыпаў, якія дзейнічаць у тэме ВІЧ і СНІД, распавесці пра неабходнасць клопату пра сябе і сваякоў, садзейнічаць уцягванню моладзі ў абмеркаванне актуальных пытанняў, звязаных з гэтай тэмай, фарміраванню талерантнага стаўлення да людзей, якія жывуць з ВІЧ.

Персанажы фільма — маладыя людзі, якія перажываюць няпростыя сітуацыі. Галоўны герой — 20-гадовы музыкант, жыве і вучыцца ў Мінску. У яго ёсць прынцыпы, ад якіх ён не гатовы адмовіцца дзеля грошай. Малады чалавек мусіць прайсці праз цэлы шэраг выпрабаванняў, каб набыць сапраўдную свабоду духу і адказнасць за сябе і навакольных.

Сцэнарый для кінапраекта піша Андрэй Курэйчык, вядомы па фільмах «Любошчы-мілошчы», «Юлечка», «Ёлкі», «Службовы раман. Наш час». Здыме фільм Дзмітрый Марынін, беларускі рэжысёр, які жыве апошнія гады ў Маскве.

Адну з галоўных місій фільма творчая група бачыць у пошуку новых маладых беларускіх герояў.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ