У Мадрыд на Сусветны дзень каталіцкай моладзі выправіліся 500 пілігрымаў з Беларусі

У Іспанію, дзе з 16 па 21 жніўня пройдуць урачыстасці, прысвечаныя Сусветнаму дню каталіцкай моладзі, чакаецца прыезд каля 2 млн маладых пілігрымаў з 170 краін свету. Прыбудзе ў Мадрыд і беларуская дэлегацыя.

Як паведаміў агенцтву БелТА каардынатар пілігрымак Віцебскай епархіі Рымска-каталіцкай царквы ў Беларусі, ксёндз Вячаслаў Барок, больш за 500 юнакоў і дзяўчат з усёй краіны выправяцца ў Мадрыд ужо 11 жніўня. Непасрэдна ў Мадрыдзе ўдзельнікі сустрэчы прабудуць каля тыдня.

Нягледзячы на тое, што сама падзея святкуецца Каталіцкай царквой, запрашэнне распаўсюджваецца на ўсіх маладых людзей.

З Беларусі разам з каталікамі едуць і праваслаўныя. «Вельмі важна, што юнакі і дзяўчаты з усяго свету, незалежна ад іх веравызнання і рэлігійных перакананняў, збіраюцца разам у адным горадзе», — падкрэсліў ксёндз Вячаслаў.

Для ўдзельнікаў запланавана шмат цікавых культурных мерапрыемстваў. У праграме -канцэрты, выставы, экскурсіі па музеях, тэатральныя паказы. Але галоўнай падзеяй будзе сустрэча паломнікаў з Папам Рымскім Бенедыктам XVI.

Такія міжнародныя сустрэчы праводзяцца раз на 3 гады. У астатні час Сусветны каталіцкі дзень моладзі адзначаецца ў межах кожнай каталіцкай дыяцэзіі. Штораз міжнародная моладзевая сустрэча праводзіцца ў розных краінах. Напрыклад, папярэдняя адбылася ў Сіднэі. Плануецца, што наступная пройдзе ў Рыа-дэ-Жанэйра.

БелТА

Хочаш падзяліцца важнай інфармацыяй ананімна і канфідэнцыйна? Пішы ў наш Тэлеграм