Беларуская філармонія абяцае цікавы сезон 1

Новы сезон у Беларускай дзяржаўнай філармоніі абяцае шмат цікавага. Пра гэта заявіў 5 верасня на прэс-канферэнцыі ў Мінску галоўны дырыжор Дзяржаўнага акадэмічнага сімфанічнага аркестра Беларусі Аляксандр Анісімаў.

Адкрыццё сезона адбудзецца ў суботу 10 верасня. Будзе выканана другая сімфонія Г. Малера, якая доўгія гады не гучала ў Мінску. Канцэрт-адкрыццё будзе адметны дэбютам — выступленнем лаўрэата ХIII Міжнароднага конкурсу імя Чайкоўскага (Масква, 2011), 19-гадовага беларускага віяланчэліста Івана Карызны. У яго выкананні прагучаць «Варыяцыі на тэму ракако» П.Чайкоўскага.

У гэты ж вечар аркестр рыхтуе для слухачоў унікальныя праекты: прэм’еры сачыненняў беларускіх кампазітараў (В.Кузняцоў — сімфонія № 4, В.Гаркуша — сімфонія № 2), сказаў Аляксандр Анісімаў.

Да новага сезона падрыхтавана 11 праграм, паведаміў галоўны дырыжор Нацыянальнага акадэмічнага народнага аркестра Беларусі імя І.Жыновіча Міхаіл Казінец. Асабліва ён адзначыў дзве, прысвечаныя 120-годдзю Максіма Багдановіча і 130-годдзю Янкі Купалы.

«Што да Янкі Купалы, то, паводле яго паэмы «Адвечная песня», у 70-я гады была напісана цудоўная рок-праграма Уладзімірам Мулявіным, якая называлася «Песня пра долю»; цяпер мы яе аднаўляем у аранжыроўцы для нацыянальнага аркестра імя Жыновіча,« — падкрэсліў Міхаіл Казінец.

Аб міжнародных праектах і супрацоўніцтве з польскімі філармоніямі расказаў на прэс-канферэнцыі мастацкі кіраўнік Беларускай дзяржаўнай філармоніі Юрый Гільдзюк. Першы сумесны праект можна будзе ацаніць ужо на наступным тыдні. «Гэтыя калектывы, у нас ужо нават ёсць афішы, паўстануць 13 верасня з Каралем Шыманоўскім і Гданьскім сімфанічным аркестрам,« — заявіў Юрый Гільдзюк.

Канцэрт «Караль Шыманоўскі, музыка без межаў» пры ўдзеле сімфанічнага аркестра Балтыйскай філармоніі (г. Гданьск, Польшча) адбудзецца ў Вялікай канцэртнай зале Белдзяржфілармоніі.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ