Кудрын прадказаў сусветнай эканоміцы «страчанае дзесяцігоддзе» 3

Сусветную эканоміку чакае «страчанае дзесяцігоддзе». З такой заявай выступіў у Вашынгтоне віцэ-прэм’ер і міністр фінансаў Расіі Аляксей Кудрын.

Паводле прагнозаў міністра, нягледзячы на ​​тое, што рэцэсіі, магчыма, удасца пазбегнуць, тэмпы эканамічнага росту ў бліжэйшыя пяць-дзесяць гадоў будуць вельмі нізкімі. На барацьбу са згасаннем росту будуць накіраваны значныя намаганні.

Кудрын не выключае, што ў Расіі ў бліжэйшае дзесяцігоддзе магчымая рэцэсія — у выпадку спаду сусветнай эканомікі ці эканомікі шэрагу буйных рэгіёнаў, напрыклад ЗША ці Еўропы.

Як адзначыў Кудрын, непасрэдным наступствам запавольвання росту эканомікі стала абвастрэнне праблемы дзяржаўнага доўгу. Гэтая праблема ў бліжэйшыя гады востра паўстане перад шэрагам еўрапейскіх краін, лічыць міністр. Сярод іншых рызык міністр назваў зніжэнне попыту з боку насельніцтва, змяншэнне здольнасці банкаўскай сістэмы ажыццяўляць крэдытаванне, а таксама скарачэнне магчымасці дзяржавы забяспечваць высокія выдаткі.

СГ

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ