Трэцякласнік моцна апёкся, дзяжурачы ў школьнай сталовай

Такім Даніла пайшоў у 3-клас 1 верасня.

А такім вярнуўся са школы 22 верасня.

Пасля нашай публікацыі пра вываз «на бульбу» шасцікласнікаў у Рэдакцыю звярнуўся Юрый Свірэпа, бацька 9-гадовага Данілы, вучня 3 «Б» класа СШ № 20 Брэста.

22 верасня з Данілам здарылася бяда: ён сутыкнуўся з кухаркай, якая несла гарачы суп. У выніку хлопчык атрымаў апёк 3-й ступені.

Выпадак з супам стаў падставай для напісання бацькамі Данілкі звароту ў Міністэрства адукацыі. У сваім лісце сп. Свірэпа гаворыць пра набалелыя праблемы пачатковай школы.

Па-першае, недапушчальнай з’яўляецца праца дзяцей да 14 год, у тым ліку ў школьных сталоўках. Па-другое, дзяцей ніхто не інструктуе наконт тэхнікі бяспекі. Як і не выдаецца спецыяльнае адзенне для гэтага.

«У школе праца дзяцей у сталовай з’яўляецца даўно ўсталяванай практыкай. Пры гэтым дзеці, якія прыцягваюцца да працы, не маюць права на забеспячэнне і выкананне адміністрацыяй школы элементарных, прадугледжаных заканадаўствам, патрабаванняў бяспекі», —

паведамляецца ў звароце.

З 2010 года ў школе, акрамя дзяцей, можа абедаць любы чалавек з вуліцы (дзеля чаго адвялі каля 10 сталоў). Колькасць сталоў для дзяцей пры гэтым зменшаная на чвэрць.

Каб паабедаць, дзеці павінны вельмі хутка накрыць, паесці і прыбраць за сабой для наступнай групы дзяцей.

Пры гэтым такая рэч, як раздатачны паднос, у школьнай сталоўцы адсутнічае. І ўсе атрымліваюць набытую ежу проста ў талерках з адзінага раздатачнага стала.

На прыкладзе таго, што здарылася з яго сынам, Юрый Свірэпа хоча ўзняць праблему бяспекі дзяцей у пачатковай школе ў цэлым.

Аксана Рудовіч

Хочаш падзяліцца важнай інфармацыяй ананімна і канфідэнцыйна? Пішы ў наш Тэлеграм