Прыўкрасны гэты свет: Мінская студэнтка лічыла знікненне вялікай сумы грошай і ноўтбука выхадкамі дамавіка

Дамавы, ілюстрацыйнае фота.

Мінская студэнтка палічыла знікненне 600 тыс. рублёў, 1,3 тыс. даляраў, 400 еўра і ноўтбука са сваёй кватэры выхадкамі дамавіка, паведаміў прэс-афіцэр Кастрычніцкага РУУС сталіцы Антон Санкевіч.

У той жа час частым госцем у кватэры дзяўчыны стаў 21-гадовы будаўнік з Маладзечна, які прыехаў у сталіцу на заробкі. Ён усяляк падтрымліваў версію сваёй знаёмай пра барабашку, ледзь не штодня распавядаючы усё новыя гісторыі пра яго выхадкі.

Невядома, як доўга яшчэ «нячыстая сіла» жыла б за кошт студэнткі, калі б бацькі дзяўчыны не параілі той заявіць пра прапажу грошай у міліцыю.

Праваахоўнікі высветлілі, што не казачны персанаж, а менавіта новы знаёмы «сваволіў» у кватэры. Хлопец дакладна ведаў, дзе захоўваюцца зберажэнні студэнткі і прысабечваў іх. Зараз у дачыненні да яго распачата крымінальная справа за крадзеж.

«Дамавіку» пагражае да чатырох гадоў пазбаўлення свабоды.

БелТА

Хочаш падзяліцца важнай інфармацыяй ананімна і канфідэнцыйна? Пішы ў наш Тэлеграм