У Гомелі невядомыя здзейснілі бандыцкі напад на актыўнага ўдзельніка Рэвалюцыі праз сацыяльную сетку Віталя Пратасевіча.
Маладзён вяртаўся з працы, раптоўна каля пад’езду жылога дому на яго наляцела група баевікоў.
Злачынцы пераследвалі хлопца да малалюднага сквера, у якім яго збілі. Віталю Пратасевічу нанеслі мноства ўдараў, характары траўмаў пакуль невядомыя. Як паведамілі знаёмыя пацярпелага, Пратасевіч пасля здарэння вельмі цяжка дыхае. Падрабязнасці нападу высвятляюцца.
Радыё Рацыя ўдалося звязацца з Віталём Пратасевічам. Пацярпелы распавёў акалічнасці здарэння. Аказваецца, яго яшчэ ў тралейбусе суправаджала чацвёрка сумнеўных бамбізаў. Адчуўшы агрэсію з боку групы невядомых, Пратасевіч выйшаў на адзін прыпынак раней, чым трэба. У гэты момант за ім выбеглі пераследнікі.
Невядомыя нападнікі дагналі актывіста ў раёне сквера, дзе нанеслі яму некалькі траўмаў у вобласці твару. У прыватнасці, у маладзёна рассечанае брыво, разбіты лоб і мноства сінякоў па ўсім целе.
Паводле збітага актывіста, хуліганы былі апранутыя ў шапкі, старанна хавалі твары шалікамі альбо нацягнутымі да вачэй гарлавінамі швэдраў.
Віталь Пратасевіч пасля некалькіх апошніх акцыяў маўклівага пратэсту ў Гомелі неаднаразова заяўляў пра пагрозы з боку супрацоўнікаў органаў дзяржбяспекі. У дадзены момант актывіст вырашае, ці будзе звяртацца ў міліцыю па факце збіцця.
Нагадаем, Гомель — адзіны ў Беларусі горад, у якім акцыі маўклівага пратэсту па серадах не прыпыняліся.
