На працягу апошніх трох гадоў Беларусь праводзіла эканамічна-інвестыцыйны форум.

Пампезнае мерапрыемства па пошуку спонсараў упершыню арганізавалі ў Лондане ў 2008 годзе.
Тады ж была сфармуляваная канцэпцыя выбару месца форума — адзін год беларусы выязджаюць за мяжу, у наступны клічуць інвестараў да сябе. Згодна з ёй, у 2009 годзе ў нашу краіну былі запрошаныя больш за 600 бізнэсоўцаў з усяго свету. У наступны год беларуская дэлегацыя на чале з прэм’ер-міністрам Сяргеем Сідорскім паехала ў Франкфурт-на-Майне. Кожнае з гэтых мерапрыемстваў падрабязна асвятлялася дзяржаўнай прэсай, а чыноўнікі «казыралі» шматмільярднымі падпісанымі пратаколамі аб намерах.

Сёлета форум мусіў адбыцца ў Мінску, аднак, ніякай падрыхтоўкі да яго так і не пачалося. Як выявілася,

правядзенне Беларускага эканамічна-інвестыцыйнага форума ў 2011 годзе не плануецца.
Пра гэта паведамілі «Нашай Ніве» ў Міністэрстве эканомікі Беларусі. Прычыны такога рашэння не ўдакладняюцца.
Адмена форума — лагічнае рашэнне, калі ўлічыць глыбокі крызіс беларускай эканомікі.
Замежныя кампаніі на працягу паўгоду не маглі свабодна канвертаваць свой прыбытак у валюту, і наўрад ці іх шляхам захацелі б прайсці новыя інвестары. Апроч таго, кожны з форумаў каштаваў бюджэту шмат мільёнаў даляраў, а ў крызісныя часы ім можна знайсці лепшае прымяненне.

Разам з тым нагадаем, што

другое значнае восеньскае мерапрыемства па дыялогу з Еўропай, «Мінскі форум», таксама было адмененае, але не з фінансавых прычын.
Ён праводзіўся з 1997 года, але арганізатары з нямецкага боку вырашылі прыпыніць дыялог,
пакуль за кратамі знаходзяцца палітычныя вязні.

Хочаш падзяліцца важнай інфармацыяй ананімна і канфідэнцыйна?