Зміцер Бандарэнка — кандыдат на прэмію Сахарава 3

Кандыдатура палітвязня Змітра Бандарэнкі прайшла ў фінал адбору намінантаў на прэмію імя Андрэя Сахарава за свабоду думкі. Пераможцу абвесцяць на наступным тыдні.

Сярод прэтэндэнтаў на прэмію таксама актывісты «Арабскай вясны» і прадстаўнікі супольнасці Сан-Хасэ дэ Апартада, якія зазналі пераслед у Калумбіі.

27 красавіка давераную асобу кандыдата ў прэзідэнты Андрэя Саннікава, каардынатара «Еўрапейскай Беларусі» Змітра Бандарэнку асудзілі на 2 гады калоніі агульнага рэжыму. У палітыка пасля арышту дыягнаставалі некалькі грыжаў дыскаў хрыбетніка і ўшчамленне спіннамазгавых нерваў. 25 ліпеня яго даставілі з Рэспубліканскай турэмнай бальніцы на вуліцы Валадарскага ў 5-ю бальніцу, дзе на наступны дзень зрабілі аперацыю.

Цяпер Бандарэнка знаходзіцца ў Магілёўскай калоніі.

Прэмія імя савецкага навукоўца і дысідэнта Андрэя Сахарава была заснаваная ў снежні 1985 года Еўрапарламентам. Яна прысуджаецца асобам ці арганізацыям, якія абараняюць правы і свабоды людзей.

У 2004 г. прэмію атрымала Беларуская асацыяцыя журналістаў. У 2006-м — кандыдат на выбарах прэзідэнта 2006-га, цяперашні кіраўнік руху «За свабоду» Аляксандр Мілінкевіч.

Радыё Свабода

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ