У судзе па справе абвінавачваных у тэрарызме Дзмітрыя Канавалава і Уладзіслава Кавалёва 25 кастрычніка было прадэманстравана відэа следчага эксперыменту ад 20 красавіка 2011 года, што тычыўся падзей 2008 года. На ім Канавалаў паказваў, як ён вырабляў выбуховыя прыстасаванні.
Адказваючы на пытанне пра матывы сваіх дзеянняў, Канавалаў спачатку паўтарыў фразу, якая ужо гучала некалькі разоў, аб дэстабілізацыі становішча ў Рэспубліцы Беларусь, а потым заявіў: «Мне не падабаецца палітыка нашага прэзідэнта». Далей гаварыць на гэту тэму Канавалаў адмовіўся.
На відэа Канавалаў распавядаў і паказваў, як вырабляў выбуховае рэчыва для выбуховых прыстасаванняў, што спрацавала і не спрацавала на святкаванні Дня Незалежнасці 4 ліпеня 2008 года, як вырабляў самі выбуховыя прыстасаванні, дэтанатары. Паказваў геаметрыю зарада, гэта значыць размяшчэнне ў пакеце
Сведкі ж, якія знайшлі выбуховае прыстасаванне, што не спрацавала, раней у судзе казалі: гайкі былі ў празрыстай упакоўцы, таму яны іх і разгледзелі.
Апрача таго, на следчым эксперыменце Канавалаў паведаміў, што тумблер засунуў у пакет праз яго накрыўку, пашкодзіўшы мембрану пальцам, і прадэманстраваў гэта. Паводле слоў сведак, накрыўка пакета была зафіксаваная стопарам і, каб адкрыць пакет, ім давялося адарваць мембрану, пад якой аказаўся тумблер.
Канавалаў 20 красавіка расказваў, што не памятае, куды дакладна да будзільніка прыпайваў правады. Наогул яго дзеянні на следчым эксперыменце былі дастаткова няўпэўненымі. Магло скласціся ўражанне, што, напрыклад, аднаўленне электроннага ланцугу прыстасавання уяўляе для яго пэўную цяжкасць. Адказваючы на пытанні, Канавалаў сказаў, што валодае мінімальнымі ведамі ў радыётэхніцы і радыёэлектроніцы, хаця схему, паводле яго слоў, збіраў сам.
На адным з допытаў, што папярэднічалі следчаму эксперыменту, Канавалаў, калі маляваў прыстасаванне бомбы, якая не спрацавала 4 ліпеня, размясціў паражальныя элементы зверху і знізу выбуховага рэчыва, калі пакет размяшчаецца вертыкальна.
На следчым эксперыменце ж ён паказаў, што ўпакоўкі з гайкамі размяшчаліся вакол выбуховага рэчыва ў форме літары «П».
Частка матэрыялаў следчага эксперыменту адносілася і да выбуху ў метро 11 красавіка 2011 года. На гэтым следчым дзеянні Канавалаў заявіў, што пры вырабе выбуховага прыстасавання не выкарыстоўваў алюмініевую пудру.
Аднак, як высветлілася, раней на допытах ён казаў зваротнае.Гэтую нестыкоўку Канавалаў растлумачыў тым, што памыліўся.
