Улетку думай пра зіму, кажа беларуская прыказка. Навагоднія ж прыгоды варта планаваць хаця б восенню. «Наша Ніва» прапануе варыянты запамінальнага адпачынку ў нашай краіне і за мяжой.
Аграсядзіба
Адпачываць у Беларусі выгадна — не надта б’е па кашальку і не даводзіцца марнаваць час на дарогу. Вакол Мінска знаходзяцца дзясяткі аграсядзібаў і катэджаў, якія шукаюць пастаяльцаў на Новы год. Цэннік у параўнанні са звычайнымі днямі павялічваецца ўдвая і дасягае $30—50 з чалавека. За святочны стол і ранішняе падмацаванне давядзецца даплаціць $15—20. З вялікай кампаніяй можна смела патрабаваць зніжку.
У сядзібах рэдка змяшчаюцца больш за 20 чалавек, таму незнаёмцаў быць не павінна. Ідэя пакатацца на лыжах і санках, добра пагуляць, а на наступны дзень вярнуцца дамоў падабаецца ўсім. Такі від святкавання варта замаўляць загадзя, але можна пачакаць і да пачатку снежня.
Санаторый ці рэстаран
Класічнае свята, толькі гатаваць самому нічога не трэба. Традыцыйнае банкетнае меню, віншаванне ад кіраўніка дзяржавы на вялікім экране і п’яныя танцы з незнаёмымі людзьмі, якім пашчасціла апынуцца ў рэстаране разам з вамі.
Санаторыі імкнуцца зацягнуць кліентаў на адпачынак не на дзень-два, а хаця б на тыдзень. Такі тур можа каштаваць каля $250, і свабодныя месцы ў прафсаюзных санаторыях яшчэ засталіся. За дзве ж начоўкі (з 31 снежня да 2 студзеня) давядзецца выкласці $100.
Снежнае замежжа
Даляр з’явіўся ў свабодным продажы, таму планаваць замежныя падарожжы стала прасцей. Навагоднія святы ў Беларусі ў апошнія гады ўсё часцей бываюць без снегу, таму адзін з прывабных варыянтаў, каб вярнуцца ў снежнае дзяцінства — Карпаты. Можна ехаць і ў Закарпацце, а можна абмежавацца Львоўшчынай.
Калі здымаць сядзібу ці катэдж цалкам, можна ўкласціся ў $250—300. За вячэру давядзецца даплаціць з разлікам $10—20 з чалавека.
Тыя, хто маюць адкрытую шэнгенскую візу, больш грошай на адпачынак і высокія патрабаванні да гарналыжных курортаў, могуць праехаць крыху далей, у Польшчу ці Славакію.
Сталічны тур
«Туры на выходныя» па суседніх краінах карыстаюцца попытам заўсёды. На Новы год — удвая, праўда, і цана істотна ўзрастае. Напрыклад, два дні ў вышэйзгаданым Львове каштуюць $250 (з банкетам) замест звычайных $100. Столькі ж каштуе і навагодні тур у Вільню.
Егіпет/Турцыя
Сустрэць Новы год можна і лежачы на пляжы і не слухаючы няспынны маналог з тэлевізара. У Егіпце, Турцыі, Індыі і іншых курортных краінах прывыклі, што еўрапейцы перадусім святкуюць Каляды, але арганізуюць урачыстую вячэру і ў беларускі Новы год.
Кошт адпачынку не моцна адрозніваецца ад звычайнага, калі не патрапіць на «дарагое» 25 снежня. Даплаціць давядзецца хіба што за саму вячэру — каля $50.
У цэлым тыднёвы адпачынак у бюджэтным гатэлі можа абысціся сям’і з двух чалавек у $1400—1600.
