Сёння пускаюць Nord Stream 6

8 лістапада афіцыйна ўваходзіць у строй першая нітка еўрапейска-расійскага трубаправода Nord Stream, пракладзенага па дне Балтыйскага мора.

Урачыстая цырымонія запуску з удзелам канцлера ФРГ Ангелы Меркель і прэзідэнта РФ Дзмітрыя Мядзведзева адбудзецца ў мястэчку Любмін каля горада Грайфсвальд, размешчанага на балтыйскім узбярэжжы былой ГДР, паведамляе Deutsche Welle. «Мы чакаем прыкладна 400 гасцей і каля 100 журналістаў з самых розных краін», — паведаміў 7 лістапада на прэс-канферэнцыі ў Берліне прэс-сакратар кампаніі Nord Stream Енс Мюлер.

Расійскі прыродны газ заўсёды паступаў да еўрапейскіх спажыўцоў па двух транспартных калідорах, што праходзяць цераз тэрыторыі Беларусі і Украіны.

Цераз Украіну ў Еўропу паступае да 120 млрд. кубаметраў газу ў год, цераз Беларусь — каля 45 млрд.

Новы энергетычны транспартны калідор, мяркуюць у ААТ «Газпром», не толькі дазволіць павялічыць аб’ёмы экспартнага продажу, але і практычна звядзе на нішто пагрозу перабояў у пастаўках у выпадку транзітных канфліктаў.

6 верасня, падчас цырымоніі запуску першай ніткі Nord Stream у тэставым рэжыме, прэм’ер-міністр Расіі Уладзімір Пуцін падкрэсліў: «Мы паступова, спакойна, без усякіх рыўкоў, адыходзім ад дыктату транзітных дзяржаў. Вось гэта і ёсць „акно ў Еўропу“ ў энергетыцы».

Магутнасць першай ніткі Nord Stream складае 27,5 млрд. кубаметраў газу штогод. Запуск праз некалькі гадоў другой ніткі газаправода павялічыць яго прапускную здольнасць да 55 млрд. кубаметраў.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ