Былы палітвязень Аляксандр Малчанаў знаходзіцца дома. Яго адпусцілі
Пасля падзей 26 кастрычніка, калі ў цэнтры Барысава невядомымі былі залітыя фарбай дзяржаўныя сцягі, супраць былога палітвязня Аляксандра Малчанава і яго сябра Андрэя Мікалаеўскага распачалі крымінальную справу за абразу дзяржаўных сімвалаў.
На кватэры Малчанава супрацоўнікі міліцыі правялі ператрус, падчас якога забралі персанальны камп’ютар. На яго склалі адміністрацыйны пратакол, і суд Барысаўскага раёна арыштаваў актывіста на 10 сутак за непадпарадкаванне супрацоўнікам міліцыі.
Тым часам на кватэры быў праведзены паўторны ператрус. Пасля гэтага і была ўзбуджана ўжо крымінальная справа — за знявагу дзяржаўных сімвалаў
У Андрэя Мікалаеўскага ператрус таксама праводзілі двойчы. Яго абвінавачваюць па тым жа артыкуле, што і Малчанава.
Абодвум хлопцам, калі справа дойдзе да суда, можа пагражаць зняволенне на тэрмін да года, альбо арышт да трох месяцаў. Іншы варыянт — да хлопцаў могуць ужыць і такую меру пакарання, як папраўчыя работы тэрмінам да двух гадоў ці грамадскія работы.
Свой арышт Малчанаў абскарджвае ў Мінскім абласным судзе. Разгляд скаргі прызначаны на 18 лістапада.
Аляксандр Малчанаў дагэтуль мае статус падазраванага ў крымінальнай справе.