Iнстытут еўрапейскіх даследаванняў і міжнародных зносінаў (IESIR, Славакія) і Беларускі інстытут стратэгічных даследаванняў (BISS, Літва) пры падтрымцы Славацкага агенцтва па супрацоўніцтве ў міжнародным развіцці (Slovak Aid) заснавалі стыпендыяльную праграму для беларускіх студэнтаў, зацікаўленых у навучанні цягам 5-6 месяцаў ў Славакіі.
Першасная мэта стыпендыяльнай праграмы імя былога дырэктара BISS Віталя Сіліцкага, які заўчасна пайшоў з жыцця гэтым летам, – удасканаліць навыкі, веды і кваліфікацыю беларускіх студэнтаў у сферах еўрапейскай інтэграцыі, інстытуцыйнага будаўніцтва і належнага дзяржкіравання.
Гэта мэта мае быць рэалізаванай праз удзел у лекцыях, семінарах, круглых сталах і дыскусіях, сфакусаваных на еўрапейскіх пытаннях, якія будуць праводзіцца як славацкімі экспертамі, так і запрошанымі гасцямі. Усе гэтыя мерапрыемствы будуць праходзіць як непасрэдна ва ўніверсітэце імя Коменскага, так і ў іншых акадэмічных інстытуцыях і даследчых цэнтрах Браціславы.
Скарыстацца праграмай могуць выпускнікі ўніверсітэтаў альбо кандыдаты навук з Беларусі. У выключных выпадках могуць разглядацца заяўкі ад паспяховых студэнтаў-бакалаўраў. Перавага будзе аддавацца тым аплікантам, хто на момант заяўкі пражываў у Беларусі, але магчымыя выключэнні.
Прапануецца ўніверсітэцкі курс на другі семестр (5 месяцаў) для 5-6 беларускіх студэнтаў ў 2011/2012 акадэмічным годзе. Студэнты, якія маюць праблемы ў сваіх навучальных установах па палітычных матывах, асабліва вітаюцца да ўдзелу.
Прадстаўляецца штомесячная стыпендыя ў 600 еўра, якая пакрывае выдаткі на пераезд, пражыванне, бытавыя выдаткі (ежа, канцтавары і г.д.) і каардынацыю. Дадаткова да стыпендыі прадстаўляецца таксама падтрымка ў суме 5000 еўра на ўсіх удзельнікаў, прадугледжаная для набыцця літаратуры і іншых выдаткаў, звязаных з даследчыцкай дзейнасцю.
Заяўнікі павінны прадставіць:
• запоўненую заяву,
• матывацыйны ліст,
• разгорнутую біяграфію
• 2 рэкамендацыйныя лісты ад лектараў, прафесараў і/альбо прадстаўнікоў НДА.
Усе дакументы, апроч рэкамендацыяў, маюць быць прадстаўленыя на англійскай мове.
Паколькі большасць курсаў будзе выкладацца па-англійску, чакаецца, што апліканты маюць добры ўзровень ангельскай мовы, пажадана засведчаны адпаведным сертыфікатам (з моўнай школы, TOEFL, іспыт Cambridge і г.д.).
Заяўкі маюць быць адпраўленыя праз электронную адрэсу [email protected] да 5 снежня 2011 года. Паспяховыя кандыдаты будуць праінфармаваныя ў хуткім часе. Працэс адбору будзе адбывацца праз інтэрв’ю ў славацкай амбасадзе альбо праз відэа-званок. Больш інфармацыі тут.
