Мінчук асуджаны на 18 гадоў за жорсткае забойства старэнькай маці 2

Да 18 гадоў пазбаўлення волі з прымусовым лячэннем ад алкагалізму судовай калегіяй па крымінальных справах Мінскага гарадскога суда прыгавораны 50-гадовы жыхар сталіцы.

Як паведамілі ў пракуратуры горада, мужчына прызнаны вінаватым у забойстве з асаблівай жорсткасцю сваёй бездапаможнай маці.

Злачынства было ўчынена ў ноч з 2 на 3 студзеня 2011 года ў кватэры дома на вуліцы Казінца. Беспрацоўны мінчанін, які ўжо каля года даглядаў хворую 81-гадовую маці,

падчас сваркі забіў жанчыну да смерці, нанёсшы ёй не менш чым паўсотні ўдараў у розныя часткі цела. Сварку сваякоў чулі суседзі.

Аднак ні ім, ні міліцыянеру, які прыйшоў на сямейны канфлікт ноччу 3 студзеня, сын загінулай дзверы не адчыніў.

Толькі раніцай 3 студзеня, калі мужчына зразумеў, што маці нежывая, ён выклікаў хуткую дапамогу. Потым высветлілася: суседзі рэгулярна бачылі састарэлую жанчыну з сінякамі. Праўда, іх паходжанне яна тлумачыла выпадковымі падзеннямі.

Вырак Мінскага гарадскога суда быў абвешчаны 26 верасня. Вярхоўны суд пакінуў яго без змяненняў. Прыгавор набыў моц 22 лістапада.

Вячаслаў Будкевіч, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ