Генпракуратура: Крымінальная справа на бізнэсоўца Шаўцова заведзена 7

Віктар Шаўцоў быў блізкім да Лукашэнкі і ўгодным царкве.

У Генеральнай пракуратуры БелаПАН пацвердзілі наяўнасць крымінальнай справы ў дачыненні да старшыні рады дырэктараў ЗАТ «Белзамежбуд», кіраўніка назіральнай рады ЗАТ «Трастбанк» Віктара Шаўцова.

Расследуе справу МУС, аднак там сітуацыю не каментуюць. Артыкул, на падставе якога распачата крымінальная справа, не называецца. Невядома таксама, ці затрыманы бізнесмен.

Паводле неафіцыйнай інфармацыі, Шаўцова затрымалі ў сярэдзіне кастрычніка — на пачатку лістапада.

Паводле чутак, прычынай для арышту маглі стаць праблемы кампаніі «Белзамежбуд», якая займаецца будаўнічымі праектамі ў Венесуэле: нібыта венесуэльскія партнёры злавілі беларусаў пры спробе ўкрасці дзве тоны арматуры. Інфармацыя пра гэта прагучала падчас чарговага візіту ў Венесуэлу памочніка прэзідэнта Беларусі Віктара Шэймана, а ў далейшым пра скандал паведамілі Аляксандру Лукашэнку.

Шаўцоў уваходзіць у дзясятку найбольш уплывовых беларускіх бізнесменаў.

Апрача будаўніцтва і фінансаў, ён мае актывы ў СП ЗАТ «МАЗ—МАН», ЗП «БМЕ-Дызель», музеі старадаўніх народных рамёстваў «Дудуткі».

* * *

23 лістапада першы віцэ-прэм’ер Уладзімір Сямашка на просьбу пракаментаваць інфармацыю аб затрыманні Шаўцова заявіў: «Не магу каментаваць, бо гэта прэрагатыва пэўных органаў». Разам з тым ён зазначыў, што «Белзамежбуд» з’яўляецца закрытым акцыянерным таварыствам, якое было створана спецыяльна для рэалізацыі беларускіх праектаў у Венесуэле. «Пачыналі яны вельмі цяжка, таму што замаўлялі нашы праекты (для будаўніцтва жылых дамоў і прадпрыемстваў), а потым даводзілася іх адаптаваць да венесуэльскіх умоў. Але ў мяне да іх прэтэнзій як да будаўнічай арганізацыі няма. Яны будуюць і выконваюць усе дамоўленасці ў тэрмін», — заявіў Сямашка.

Ён назваў «Белзамежбуд» «удалым кангламератам». Прадпрыемства «было створана правільна і функцыянавала паспяхова», мяркуе першы віцэ-прэм’ер.

ЗАТ «Белзамежбуд» было створана ў 2007 годзе з удзелам «Трастбанка». Кампанія рэалізуе найбуйнейшыя будаўнічыя праекты ў Венесуэле, Амане, Саудаўскай Аравіі, Аўстрыі, Аргенціне, Германіі, Карэі, ААЭ.

ЗАТ «Трастбанк» з’яўляецца адным з найстарэйшых прыватных банкаў у Беларусі: быў створаны ў 1994 годзе і называўся тады «Інфабанк». Перайменаваны ў лютым 2005 года пасля палітычнага скандалу. Мінфін ЗША абвінаваціў «Інфабанк» у «адмыванні грошай для рэжыму Садама Хусейна», заробленых у выніку здзелак, якія ажыццяўляліся ў абход праграмы ААН «Нафта ў абмен на харчаванне» і з выкарыстаннем незаконных надбавак і завышаных кантрактаў. «Інфабанк» тады афіцыйна адхіліў усе абвінавачанні, аднак хутка змяніў назву.

З 2001 года акцыянерам «Інфабанка» з доляй 35% з’яўляўся Лівійскі арабскі замежны банк, які выйшаў са складу ўласнікаў беларускага банка ў 2008 годзе.

Летам гэтага года Шаўцоў за дабрачынную дзейнасць быў удастоены вышэйшай узнагароды Беларускай праваслаўнай царквы — ордэна святога Кірыла Тураўскага, а яго жонка Алена — медаля Ефрасінні Полацкай.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ