Сярэдні памер дапамогі па беспрацоўі ў Мінску — 120 тысяч рублёў, або 11 еўра 8

Афіцыйны ўзровень беспрацоўя ў Мінску на 1 снежня склаў 0,3% эканамічна актыўнага насельніцтва. За лістапад гэты паказчык не змяніўся,

паведамілі ва ўпраўленні занятасці камітэта па працы, занятасці і сацыяльнай абароне Мінгарвыканкама.

Сярэдні памер дапамогі па беспрацоўі ў лістападзе склаў 121,6 тыс. рублёў. У кастрычніку памер дапамогі складаў 103,1 тыс. рублёў. Для параўнання: бюджэт пражытачнага мінімуму ў Беларусі — 574.790 рублёў.

***

На 1 снежня ў сталіцы зарэгістраваны 3.201 беспрацоўны. За студзень-лістапад па садзеянне ў працаўладкаванні звярнулася больш за 23,2 тыс. чалавек. На пастаянную ці часовую працу ўладкавана 13.028, з іх 7.204 беспрацоўныя атрымалі пастаянную працу.

На часовую працу ў вольны ад вучобы час у студзені-лістападзе пры садзеянні службы занятасці ўладкаваны 3.650 студэнтаў і школьнікаў. На прафесійную падрыхтоўку, перападрыхтоўку і павышэнне кваліфікацыі накіраваны 1.610 беспрацоўных. У грамадскіх работах удзельнічалі 4.781 чалавек, у тым ліку 3.022 беспрацоўных.

Колькасць заяўленых вакансій на прадпрыемствах горада на 1 снежня склала 19.091, у тым ліку для працоўных — 14.800.

За адзінаццаць месяцаў зарэгістравана прыкладна 240,9 тыс. зваротаў суіскальнікаў працы да электроннага банка вакансій у аддзелах працаўладкавання і амаль 7,8 млн. зваротаў да электроннага банка вакансій, размешчанага на сайце Мінгарвыканкама. Паводле даных камітэта, найболей запатрабаванымі спецыялістамі ў Мінску з’яўляюцца вадзіцелі аўтамабіляў (823 вакансіі), рабочыя па комплекснай уборцы (373), грузчыкі (394), муляры (854), кандуктары (400), маляры (494), цесляры (248), падсобныя рабочыя (560), тынкоўшчыкі (665), урачы-спецыялісты (266), інспектары (130), медсёстры (607).

Марына Носава, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ