Белстат: Інфляцыя з пачатку года склала 107,5%

З 1 па 20 снежня спажывецкія цэны ў Беларусі выраслі на 1,7% (з 1-га па 13-е — на 1,5%, з 14-га па 20-е — на 0,2%), паведамляе Нацыянальны статыстычны камітэт.

Найбольш прырост цэн з пачатку месяца адзначаны на піва (7,6%), ялавічыну першай катэгорыі (5,6%), фруктовыя сокі (4,7%), маянэз (3,5%), маргарын (3,2%), жывую рыбу (2,8%), мясныя паўфабрыкаты з ялавічыны, паўвэнджаную каўбасу, мясныя і рыбныя кансервы, аўсяныя шматкі «Геркулес», пшанічную муку, кандытарскія вырабы, безалкагольныя напоі (1,5–2,6%), бензін (10,3%), медыкаменты (5,4%), посуд (3,3%), трыкатажныя вырабы (2,2%), тканіны (1,9%), паслугі дашкольных устаноў (93,9%), медыцынскія паслугі (11,1%), бытавыя паслугі (6,8%), паслугі сувязі (6,2%), паслугі культуры (4,1%), санаторна-аздараўленчыя паслугі (3,2%).

Патаннелі пшанічна-аржаны хлеб (0,1%), тлусты тварог (0,3%), морква (0,9%), смятана (1,1%), проса (1,4%), белакачанная капуста (1,9%), малако (2,9%), паўфабрыкаты з мяса птушкі (3%), грэчка (3,1%), алей (4%).

Са студзеня па лістапад 2011 года спажывецкія цэны выраслі на 104%, з улікам 20 дзён снежня — на 107,5%.

Міністр фінансаў Андрэй Харкавец заявіў 16 снежня, што па выніках года рост цэн можа скласці 120% (2,2 разу).

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ