НКВД забіла ў Беларусі 3782 грамадзяніна Польшчы 14

НКВД не забіла ў Беларусі ніводнага паляка, заявіў Лукашэнка на пятнічнай прэс-канферэнцыі, адказваючы на пытанне польскага журналіста наконт «катынскага спісу, які нагадаў Лукашэнку ягоныя ж леташнія словы пра тое, што ў мінскіх архівах можа быць спіс асобаў, якіх забілі ў Беларусі ў рамках гэтак званай катыньскай справы.

Лукашэнка заявіў у пятніцу, што ў Беларусі не расстралялі ніводнага паляка, маўляў, тут былі толькі перасыльныя пункты. Далей палякаў вывозілі ў Расію ці ва Украіну, сказаў Лукашэнка, цытуючы ліст тагачаснага кіраўніка беларускага НКВД Цанавы да Берыі ў Маскву.

«Гэта не толькі хлусня, але і бязмежная крывадушнасць», —

 сказаў польскаму выданню пра лукашэнкаўскія словы прафесар Войцех Матэрскі. Лукашэнка выкарыстоўвае польскую трагедыю ў гульні з Масквой. Калі ён сварыўся з Крамлём, то намякаў, што аддасць палякам спіс. Цяпер жа, калі ён пагадзіўся з Масквой, зноў забыў пра гэты спіс.

Гэта з’яўляецца апошняй катынскай таямніцай.

НКВД забіла ў Беларусі 3782 палякаў, якія знаходзіліся ў той час у турмах на тэрыторыі БССР. Па сённяшні дзень невядомыя дадзеныя тых людзей, а таксама месца іх расстрэлу і пахавання.

Паводле словаў іншага гісторыка Збігнева Сямашкі,

заявы Лукашэнкі — поўная лухта.

З савецкіх дакументаў вядома, што палякаў расстралялі ў Беларусі, бо мінскае НКВД атрымала з Масквы расстрэльныя загады. Таксама як ва Украіне ў 1940-м годзе польскіх вязняў прывезлі ў мінскую турму. Далейшы іх лёс невядомы. Лічыцца, што іх расстралялі ды пахавалі ў Курапатах альбо іншым сакрэтным месцы НКВД. Вось ужо 20 год расійскае кіраўніцтва не хоча перадаць палякам адпаведныя дакументы па гэтай справе. Гісторыкі лічаць, што ў Беларусі можа захоўвацца копія. Пра гэта сведчаць украінскія матэрыялы: у Кіеве захавалася копія ўкраінскага сьпісу, якую афіцыйны Кіеў перадаў палякам. Больш за тое, савецкі НКВД вёў вельмі дакладную дакументацыю сваіх злачынстваў, таму словы Лукашэнкі не вартыя даверу, піша польскае выданне.

Паводле Radyjo.net

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ