Тэнгіз Думбадзэ: «За беларускамоўныя сюжэты я б плаціў у 10 разоў больш» 21

«Самай вялікай трагедыяй Беларусі я лічу яе моўны момант», — пра гэта заявіў у інтэрв’ю «Звяздзе» тэлевізіёншчык Тэнгіз Думбадзэ. Раней ён вёў ток-шоу на канале АНТ, падсядзеўшы ў эфіры Сяргея Дарафеева, а цяпер перайшоў на грашовую пасаду ў Тэлерадыёвяшчальную арганізацыю Саюзнай дзяржавы.

«Я пачынаю ганарыцца, калі чую, як размаўляюць на нашай мове.

Беларускамоўныя сюжэты па тэлебачанні вітаю. Карэспандэнтам, якія іх рыхтуюць, я ганарар плаціў бы ў 10 разоў большы — каб іх прыклад быў „заразны“, —

перакананы ён. — У свой час, калі я працаваў на тэлебачанні Аджарыі, інфармацыйныя праграмы вяліся на васьмі мовах — мы ўдзялялі ўвагу любой этнагрупе, якая жыла тады ў рэгіёне. Перакананы, што сёння такі падыход неабходны ва ўсіх кутках свету.

Вы можаце такое ўявіць: я хачу стаць грамадзянінам Расіі, але буду ігнараваць рускую мову? Гэта смешна.

А чаму тады аналагічная сітуацыя ў іншай рэспубліцы ўспрымаецца нармальна?

Можа, і нам варта так? Ставіць умовы.

Адна з умоў — абавязковае веданне беларускай мовы.

Але таксама будзе дзіўна, калі самі беларусы па-беларуску не змогуць сказаць ні слова, а вось ад выхадцаў з Азербайджана ці Мазамбіка мы будзем патрабаваць ведання беларускай мовы. Абсурд!»

інф. «Звязды»

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ