Лукашэнка наведаў Дом міласэрнасці і абмяняўся падарункамі з мітрапалітам Філарэтам 13

7 студзеня Аляксандр Лукашэнка наведаў сталічны Дом міласэрнасці, дзе сустрэўся з мітрапалітам Мінскім і Слуцкім Філарэтам, патрыяршым экзархам усяе Беларусі.

Як паведамляе прэс-служба прэзідэнта, паводле традыцыі Лукашэнка ў свята Раства Хрыстова запаліў свечку ў праваслаўным храме.

Аляксандр Лукашэнка і мітрапаліт Філарэт абмяняліся падарункамі. Кіраўніку Беларускай праваслаўнай царквы

перададзены ў дар унікальны асобнік Евагнелля. Кніга выканана ў старажытных літургічных традыцыях і прызначана для выкарыстання падчас набажэнстваў. Тэкст надрукаваны на царкоўнаславянскай мове.

Верхняя і ніжняя вокладкі ўпрыгожаны багатым акладам з чаканкі з выявамі Ісуса Хрыста і чатырох евангелістаў. Гэты падарунак прызначаны для асабістай бібліятэкі Філарэта, які збірае рэдкія і ўнікальныя кнігі, паведамляе прэс-служба прэзідэнта. Што было падорана Лукашэнку ў адказ, не ўдакладняецца.

«Затым паміж Аляксандрам Лукашэнкам і ўладыкам Філарэтам адбылася цёплая нефармальная гутарка пра духоўнае адраджэнне грамадства, пра ўзаемадзеянне дзяржавы і Беларускай праваслаўнай царквы, пра развіццё хрысціянскай цывілізацыі ў сучасным свеце», — гаворыцца ў паведамленні.

Андрэй Серада, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ