Гомельскія «пахавальнікі» куплялі інфармацыю пра нябожчыкаў у міліцыі 3

Упраўленнем Следчага камітэта па Гомельскай вобласці распачатая крымінальная справа, прадметам якой стаў «зліў» інфармацыі аб памерлых грамадзянах.

Такія звесткі асабліва цікавыя для тых, хто займаецца аказаннем рытуальных паслуг. Як і на ўсякі попыт, знайшлася прапанова.

У атрыманні хабару падазраецца памочнік дзяжурнага аднаго з аддзяленняў міліцыі, выкрыты супрацоўнікамі 6-га ўпраўлення (па Гомельскай вобласці) Галоўнага ўпраўлення ўласнай бяспекі МУС Беларусі. Высветлена, што грошы міліцыянту перадаваў знаёмы — прадпрымальнік, які мае пахавальны бізнэс. За гэта не абцяжараны этыкай вартавы парадку паведамляў пра людзей, якія памерлі на тэрыторыі, падведамнай АУС. А ўжо камерсант ведаў, як правільна выкарыстоўваць інфармацыю.

Следчыя УСК высвятляюць акалічнасці такога супрацоўніцтва. Не выключана, што колькасны склад фігурантаў справы папоўніцца. Як паказала праверка, аналагічным грашылі і работнікі іншых дзяржаўных установаў.

Характэрна, што сама тэма зацікавіла праваахоўныя органы пасля публікацыі ў адным з гомельскіх друкаваных выданняў. У артыкуле расказвалася пра абуральны выпадак, калі памерлая ў лякарні жанчына была ў экстраным парадку пахаваная цалкам староннімі людзьмі. Пры гэтым яны ўмудрыліся атрымаць належную для такіх выпадкаў дапамогу, але нават не знайшлі часу паведаміць сыну памерлай, які жыве ў іншым рэгіёне.

Дарэчы, падобная крымінальная гісторыя ўжо мела месца ў Гомелі некалькі гадоў таму. Тады пагарэлі работнікі моргаў, якія па загадзе кіраўніцтва, а часам пераследуючы ўласны інтарэс, забяспечвалі інфармацыяй прыватныя рытуальныя фірмы. Узаемавыгаднае супрацоўніцтва працягвалася, пакуль пра яго не стала вядома ў мясцовым упраўленні КДБ. Па завяршэнні следства былі асуджаныя начальнік абласнога клінічнага патолагаанатамічнага бюро і загадчык арганізацыйна-кансультатыўнага аддзялення.

region.ej.by

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ