У гомельскага бізнесмена скралі грошы з пластыкавай карткі 2

Гомельскі бізнесмен пазбавіўся грошай, якія невядомыя знялі з яго банкаўскай карткі ў Італіі.

Як паведаміў намеснік пракурора Чыгуначнага раёна Гомеля Уладзіслаў Журакоўскі, грошы былі зняты з рахунку ў той момант, калі бізнесмен знаходзіўся ў Гомелі. Праверка паказала, што грошы атрымалі ў невялікім італьянскім гарадку.

Паводле слоў Журакоўскага, восенню 2011 года дырэктар прыватнай фірмы Гомеля падчас падарожжа пабываў у Грэцыі, Польшчы і Германіі. У розных краінах ён расплачваўся пластыкавай карткай камерцыйнага банка. Пры гэтым у яго была падключана паслуга СМС-паведамлення пры зняцці грошай з рахунку.

«Калі ён вярнуўся з паездкі і знаходзіўся ў Гомелі, яму прыйшло на мабільны тэлефон паведамленне, што ў італьянскім гарадку з яго рахунку знята больш за 3,5 тыс. еўра.

Бізнесмен тут жа заблакаваў картку. Цікава, што ўжо пасля таго, як банк заблакаваў картку, былі зроблены яшчэ некалькі спробаў зняць з яе грошы, але ўжо з італьянскага Мілана», — пракаментаваў намеснік пракурора.

Дырэктар фірмы сцвярджае, што не быў у Італіі, у яго няма там знаёмых ці сваякоў і ён нікому не перадаваў дадзеныя свайго карт-рахунку ці пін-код карткі.

Аддзел Следчага камітэта па Чыгуначным раёне Гомеля распачаў 27 студзеня справу на падставе артыкула 212 КК (крадзеж шляхам выкарыстання камп’ютарнай тэхнікі). Вядзецца следства.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ