Урад рэкамендуе ўключаць у калектыўныя дамовы пытанні харчавання работнікаў 4

Урад Беларусі рэкамендуе наймальнікам і прафсаюзным арганізацыям уключаць у калектыўныя дамовы пытанне стварэння ўмоў для харчавання работнікаў і патаннення яго кошту. Такое рашэнне ўтрымліваецца ў пастанове Савета міністраў ад 7 лютага № 127, паведаміла прэс-служба ўрада.

Рэспубліканскія органы дзяржаўнага кіравання і іншыя дзяржаўныя арганізацыі, падпарадкаваныя ўраду, аблвыканкамы і Мінскі гарвыканкам абавязаны прыняць меры па стварэнні ў 2012 годзе юрыдычнымі асобамі ўсіх форм уласнасці ўмоў для харчавання работнікаў. Гэта можа быць забяспечана з дапамогай арганізацыі працы аб’екта грамадскага харчавання або абсталявання памяшкання для прыёму ежы, або дастаўкі харчавання па заказах работнікаў і выязнога абслугоўвання арганізацыямі, што спецыялізуюцца на аказанні такіх паслуг, а таксама прымянення іншых форм абслугоўвання, мяркуюць ва ўрадзе.

Міністэрству працы і сацыяльнай абароны сумесна з Федэрацыяй прафсаюзаў Беларусі даручана ажыццяўляць пастаянны кантроль за станам створаных юрыдычнымі асобамі ўмоў для харчавання работнікаў. Пра ход і вынікі выканання гэтай пастановы неабходна будзе інфармаваць урад.

Як паказвае практыка, зазначае прэс-служба,

зараз толькі каля трэці прадпрыемстваў Беларусі часткова кампенсуюць рабочым кошт харчавання.

Многія заводскія сталоўкі патрабуюць капітальнага рамонту, замены абсталявання. Некаторыя прадпрыемствы вырашылі адмовіцца ад утрымання сталовак. Асабліва гэта тычыцца будаўнічых арганізацый, дзе самастойна харчуюцца больш як 50% працаўнікоў.

У сувязі з гэтым Мінгандаль прапанаваў унесці ў генеральнае пагадненне паміж урадам Беларусі, рэспубліканскімі аб’яднаннямі наймальнікаў і прафсаюзамі на 2011–2013 гады раздзел па арганізацыі харчавання рабочых і служачых па месцы працы. «Такое юрыдычна замацаванае палажэнне дазволіць на прадпрыемствах рэспублікі павысіць сацыяльную абароненасць працоўных калектываў», — мяркуюць распрацоўшчыкі дакумента. Гэта прапанова атрымала таксама падтрымку з боку прафсаюзаў, зазначае прэс-служба.

Зараз вызначаны механізмы, якія не дазволяць дапусціць рэзкага росту цэн на харчаванне, гаворыцца ў прэс-рэлізе. У залежнасці ад колькасці працоўных і магчымасцяў прадпрыемства прапанавана забяспечыць працу сталоўкі або абсталяваць пакоі прыёму ежы, дзе абавязкова ўстанавіць халадзільнік, СВЧ-печ, набыць неабходны посуд, або павінна быць арганізавана дастаўка гарачага харчавання з прыцягненнем кейтарынгавых кампаній.

Марына Носава, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ