Вольскі раздаваў аўтографы на капоце аўто 7

Больш за тры дзясяткі людзей прыйшлі да клубу RE:public, каб вярнуць квіткі за адменены канцэрт «Крамбамбулі» і паразмаўляць з Лявонам Вольскім.

Сам Лявон ахвотна раздаваў інтэрв’ю, не губляў надзею на выпраўленне сітуацыі з арганізацыяй канцэртаў у Беларусі.

Вольскі запрасіў усіх на канцэрт «Крамбамбулі» ў Вільню.

З-за вялікага марозу людзі вярталі квіткі ў салоне аўто. Сустрэча ля ганка RE:public доўжылася больш за гадзіну.

Квіткі здалі каля 100 чалавек. «Некаторыя не хацелі забіраць грошы, але мы настаялі», — расказаў НН Лявон Вольскі.

Нагадаем, што прэзентацыя альбома «Крамбамбулі» пад назвай «Драбадзі-драбада» мелася прайсці сёння, 11 лютага, у сталічным клубе RE:public. Анонсы з’явіліся ў канцы снежня. Аднак

месяц таму, адразу пасля таго як білеты паступілі ў продаж, кіраўніцтва клуба заявіла, што канцэрт будзе адменены.

«Мы планавалі правесці гэты канцэрт у нас у клубе, але з-за пэўных абставінаў вырашылі яго не праводзіць», — тлумачыў тады дырэктар клуба Андрэй Старцаў.

На 11 лютага ў клубе прызначылі зборны канцэрт з удзелам гуртоў Akute, Петля Пристрастия, Yellow Brick Road і Дзіма Ску.

Праект «Крамбамбуля» ўключаны ў негалосны спіс прадстаўнікоў кіно, музыкі, мастацтва, якім неафіцыйна забаронены выступ на канцэртных пляцоўках у Беларусі ды тэле і радыёканалах.

Сярод іх — таксама «Ляпіс Трубяцкой», «Крама», «Палац», «Нейра Дзюбель», Зміцер Вайцюшкевіч, драматург Андрэй Курэйчык, увесь калектыў «Свабоднага тэатра», пісьменнікі Вольга Іпатава, Генадзь Бураўкін, мастакі Мікола Купава, Аляксей Марачкін, драматург Уладзімір Халіп. Дзяржаўныя асобы адмаўляюць наяўнасць такога спісу, але ён фактычна дзейнічае.

Прэзентацыя альбома «Драбадзі-драбада» пройдзе ў Вільні 21 красавіка ў клубе «Tamsta» (Subačiaus g. 11A) і 26 красавіка — у Празе ў клубе «Matrix» (Konevova 13).

Фота: Сяргей Гудзілін

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ