Мядзведзеў і Ягланд абмяркуюць сітуацыю ў Беларусі

Прэзідэнт Расіі Дзмітрый Мядзведзеў і генеральны сакратар Рады Еўропы Турб’ерн Ягланд плануюць абмеркаваць сітуацыю ў Беларусі.

Сустрэча палітыкаў адбудзецца ў рамках навукова-практычнай канферэнцыі Расійскага савета па міжнародных справах «Еўраатлантычная супольнасць бяспекі: міф ці рэальнасць», якая пройдзе ў Маскве 23 сакавіка.

Плануецца таксама, што генеральны сакратар Рады Еўропы правядзе перамовы з міністрам замежных спраў Расіі Сяргеем Лаўровым.

Нагадаем, у сярэдзіне 1990-х гадоў Беларусь была пазбаўлена статусу спецыяльнага запрошанага ў Парламенцкай асамблеі Рады Еўропы (ПАРЕ). Некалькі гадоў таму ў ПАРЕ абмяркоўвалася магчымасць вяртання беларускаму парламенту гэтага статусу, але — пры выкананні шэрагу ўмоў, галоўнай з якіх з’яўляецца ўвядзенне мараторыя на смяротную кару. Аднак напярэдадні абмеркавання адпаведнай рэзалюцыі ў Беларусі былі прыведзены ў выкананне некалькі смяротных прыгавораў, і ПАРЕ адмовілася ад гэтай ідэі.

Турб’ерн Ягланд асудзіў нядаўняе рашэнне Аляксандра Лукашэнкі адмовіць у памілаванні Уладзіславу Кавалёву і Дзмітрыю Канавалаву, прыгавораным да смяротнай кары па абвінавачанні ў тэрарызме.

«Беларусь — адзіная краіна ў Еўропе, дзе ўсё яшчэ караюць смерцю людзей. З іх непавагай да асноўных правоў чалавека і дэмакратычных стандартаў, улады Беларусі ўсё больш ізалююць сваю краіну і яе людзей ад усяго астатняга свету», — заявіў Ягланд пасля таго, як стала вядома аб адмове ў памілаванні.

БелаПАН

Хочаш падзяліцца важнай інфармацыяй ананімна і канфідэнцыйна? Пішы ў наш Тэлеграм