Бараўляны пратэстуюць супраць будаўніцтва хімзавода 7

У суботу праходзіць у Бараўлянах сход супраць будаўніцтва, фота з фэйсбука Сержука Семянюка

Жыхары вёсак Дроздава і Малінаўка Бараўлянскага сельсавета б’юць трывогу. На ўчастку паміж іх населенымі пунктамі, за пару кіламетраў ад Мінска, кампанія СААТ «М-Стандарт» мае пабудаваць завод па вытворчасці хімічных сродкаў. Жыхары элітных катэджавых пасёлкаў, вядома ж, супраць.

Яны куплялі свае ўчасткі за $50–70 тысяч для таго, каб жыць у чыстым месцы, без забруджаных грунтовых водаў.

Гісторыя пачалася яшчэ ў сакавіку 2010 года, калі Мінаблвыканкам заключыў інвестыцыйную дамову з СААТ «М-Стандарт». Згодна з ёй, кампанія атрымала 5,55 га зямлі, на якіх у жніўні 2012 года мае адкрыцца вытворчасць.

На заводзе будуць выпускаць ахаладжальную вадкасць для дызельных аўтамабіляў і спецыяльны рэагент.

Агульны аб’ём вытворчасці на першым этапе складзе прыблізна па 4 тысячы тон першага і другога прадукту. У атмасферу пры гэтым будзе трапляць 2,8 тоны шкодных выкідаў штогод.

Дроздаўцаў такі варыянт не задавальняе. Яны адзначаюць, што, згодна з планам развіцця прыгараднай зоны Мінска, будаўніцтва хімічных прадпрыемстваў у гэтым месцы ў прынцыпе забаронена. Але працы ўсё адно праводзяцца. «На працягу 2011–2012 гадоў засвоена 27,8 мільярда рублёў, створана 31 працоўнае месца», — гаворыцца ў афіцыйным адказе дроздаўцам, падпісаным намеснікам старшыні аблвыканкама Аляксандрам Ермаком.

Чыноўнік даводзіць, што выконваюцца ўсе патрэбныя нормы: дазвол ад абласнога камітэта прыродных рэсурсаў і аховы навакольнага асяроддзя атрыманы, санітарна-ахоўная зона складае не 50 метраў, як патрабуе заканадаўства, а нават 100 метраў.

Вось толькі жыхары вёсак усё адно не разумеюць, навошта будаваць прадпрыемства менавіта каля Мінска.

Калі прадаць зямлю завода пад катэджы, бюджэт можа атрымаць больш за $1 мільён. «У чым заключаецца інавацыйнасць вытворчасці, якой так хваліцца „М-Стандарт“? — абураецца прадстаўнік ініцыятыўнай групы Уладзімір, які расклейвае інфармацыю пра небяспечнае суседства. — Прывязуць хімікаты з-за мяжы, на адкрытай пляцоўцы будуць зліваць этыленгліколь з аўтацыстэрнаў у нейкія ёмістасці, а пасля ўручную разліваць у пластыкавыя кантэйнеры. Гэта фактычна прапісана ў праекце».

Каналізацыя ў праекце адсутнічае, атрымліваецца, што сцёкі пойдуць у глебу. Ёсць рызыка забруджвання грунтовых водаў. Гэта не адмаўляюць і ў Міністэрстве аховы прыроды, улічваючы магчымыя праблемы ў наступных пакаленняў дроздаўцаў. «Пры распрацоўцы праекта ўлічана тэарэтычная верагоднасць забруджвання падземнага ваданоснага грунту, якая ў выпадку аварыйных сітуацый дасягне яго праз 50 гадоў», — адказала намесніца міністра Галіна Ваўчуга.

Прадстаўнікі кампаніі «М-Стандарт» не каментуюць сітуацыю, раячы звяртацца да чыноўнікаў.

Сёння, 21 красавіка, у Бараўлянах пачынаецца вялікі сход супраць будаўніцтва хімзавода.

ЯМ

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ