ПІКНІК.BY: ад Паліны да фанку

Абвешчаная дата аднаго з самых значных оўпэн-эйраў гэтага лета — фэстывалю «ПІКНІК.BY», які ладзіцца паб-клубам «Графіці» пры інфармацыйнай падтрымцы інтэрнэт-парталу Tuzin.FM.

30 чэрвеня на хутары Шаблі (Валожынскі раён) выступяць самыя розныя айчынныя выканаўцы — ад Паліны Рэспублікі да сталых рэзыдэнтаў Funk on Fridays. Выступамі музыкаў ды ды-джэяў дзея не абмяжуецца.

Ідэя маштабнага оўпэн-эйру з удзелам беларускіх выканаўцаў паўстала ў сувязі з ьвяткаваннем 10-годдзя клуба «Графіці». Тады ў 2009 годзе на хутары Прудавое пад Мінскам прайшоў першы «Пікнік», які стаў адной з галоўных музычных падзеяў таго лета. Сёлета вырашана было вярнуцца да ідэі такога фестывалю.

«Нам хочацца зрабіць не проста канцэрт на свежым паветры, а зладзіць мерапрыемства з масай музыкі, тэматычных зонаў, майстар-класаў.

У тым і адрозьненне нашага фестывалю ад падобных, што праводзяцца ў межах нашай краіны. Мы ставім на разнастайнасць і ў такім фармаце, на жаль, у нас больш ніхто не працуе», — кажа адзін з арганізатараў фэсту «ПІКНІК.BY» Нік Маторын.

Адна з разынак фэсту — сцэна «Тузін. Unplugged», дзе выступяць удзельнікі сумеснага праекту інтэрнэт-парталу Tuzin.FM, кампаніі «Будзьма беларусамі» і паб-клуба «Графіці».

На гэты момант свой удзел у фестывалі пацвердзілі гурты

Akute, Chiefs Band, The UNB, РСП, Botanic Project, Паліна Рэспубліка, «Адыс Абеба», «Гаротніца», «Нагуаль», ужывую таксама прадставяць свой сумесны праект Diamos Roll і Руся,

выступяць пастаянныя рэзідэнты Funk on Fridays ды, натуральна, Papa BO. Спіс выступоўцаў будзе папаўняцца.

Акром музычнай часткі, плануецца зладзіць кальян-зону, выставы, фотаэкспазіцыі.

Ахвочыя могуць пагуляцца на 8- і 16-бітных прыстаўках, а таксама ў настольныя гульні, фрысбі, бадмінтон, валейбол. Мяркуеццца падчас фестывалю зладзіць школы тэатралаў, танцораў і капаэйры.

Абяцаецца таксама кінатэатр пад адкрытым небам, шапікі з разнастайнымі самаробнымі цікавосткамі ды шмат яшчэ чаго цікавага.