Прэм’ер-міністр Міхаіл Мясніковіч даручыў Мінадукацыі і зацікаўленым міністэрствам і ведамствам вырашыць пытанні кадравага забеспячэння сістэмы агульнай і сярэдняй адукацыі. Аб гэтым ён заявіў 4 мая на пасяджэнні Прэзідыума Саўміна, дзе разглядаўся ход выканання праграмы развіцця агульнай сярэдняй адукацыі Беларусі на 2007–2016 гады.
Паводле слоў кіраўніка ўрада, у асобных рэгіёнах адчуваецца недахоп кадраў у школах. «Калі глядзіш матэрыялы, бачыш: не хапае настаўнікаў інфарматыкі, фізікі, матэматыкі, замежнай мовы, — канстатаваў ён. — Сістэма для сябе рыхтуе кадры і рыхтуе недастаткова, не працуе над замацаваннем гэтых кадраў».
Міхаіл Мясніковіч адзначыў, што пытанні кадравага забеспячэння, павышэння якасці адукацыі, абсталявання ўстаноў адукацыі, асабліва пытанні развіцця сучаснага інфармацыйнага асяроддзя, патрабуюць больш увагі. «Мы павінны ісці ў нагу з часам і нават з пэўным апярэджаннем у гэтым плане», — падкрэсліў ён.
Аналізуючы вынікі выканання праграмы развіцця агульнай сярэдняй адукацыі ў Беларусі з пункту гледжання фінансавання яе мерапрыемстваў, прэм’ер-міністр звярнуў увагу, што толькі рэспубліканскі бюджэт выканаў свае абавязацельствы па праграме. «Калі гаварыць пра абласныя і мясцовыя бюджэты, то, на жаль, гэта толькі 20 працэнтаў. Горш за ўсіх выглядаюць Віцебская і Брэсцкая вобласці (у два разы ніжэй за гэты ўзровень)», — канстатаваў ён. У абласных бюджэтах знаходзяцца сродкі для падтрымання тых ці іншых праектаў, стварэння і мадэрнізацыі вытворчасці, будаўніцтва, аднак адукацыі ўдзяляецца недастаткова ўвагі. Разам з тым, на думку Міхаіла Мясніковіча, гэта пытанне патрабуе вырашэння нараўне з іншымі.
У сваю чаргу міністр адукацыі Сяргей Маскевіч адзначыў, што праграма развіцця агульнай сярэдняй адукацыі накіравана на стварэнне ўмоў для дынамічнага развіцця школ.
Для недапушчэння зніжэння якасці адукацыі ў выніку пераходу з
12-гадовага на
11-гадовы тэрмін навучання, пяцідзённы навучальны тыдзень і адмовы ад прафілізацыі спатрэбілася арганізаваць сістэму факультатываў, цалкам перагледзець адукацыйныя стандарты, тыпавыя навучальныя планы, навучальныя праграмы. Прыняцце ў 2010 годзе рашэння аб павелічэнні колькасці гадзін замежнай мовы прывяло да карэкціроўкі праграмнай дакументацыі і падручнікаў. Пакуль гэта работа не завершана.
У сувязі з увядзеннем у дзеянне кодэкса аб адукацыі навучальны год 2011–2012 года пачаўся практычна з цалкам абноўленай нарматыўна-прававой базы ў сферы агульнай адукацыі. «Агульная і сярэдняя адукацыя забяспечана навучальна-практычнай і навучальна-метадычнай дакументацыяй у поўным аб’ёме, — падкрэсліў прэм’ер-міністр. — Сёння мы маем камплект нацыянальных падручнікаў для сярэдняй школы». Сяргей Маскевіч нагадаў пра праводзімы ў Беларусі эксперымент па апрабацыі мадэлі навучання школьнікаў з выкарыстаннем індывідуальных электронных устройстваў. «На працягу двух гадоў у краіне плануецца стварыць комплекс электронных рэсурсаў па навучальных прадметах», — паведаміў кіраўнік Міністэрства адукацыі.
БелТА
Хочаш падзяліцца важнай інфармацыяй ананімна і канфідэнцыйна?
Пішыце рэдактару «Нашай Нівы» ў ТГ
