Мясніковічу паскардзіліся на Латушку

Старшыня рэспубліканскай рады грамадскага аб’яднання «Беларускае добраахвотнае таварыства аховы помнікаў гісторыі і культуры» Антон Астаповіч прапаноўвае распусціць Рэспубліканскую грамадскую раду па справах культуры і мастацтва пры Савеце міністраў Беларусі.

Адпаведную прапанову ён накіраваў прэм’ер-міністру Міхаілу Мясніковічу 4 чэрвеня заказным лістом. Пра гэта Астаповіч паведаміў сёння на прэс-канферэнцыі ў Мінску.

«5 кастрычніка 2011 года мелася адбыцца пасяджэнне рады, прысвечанае праблемам аховы аб’ектаў гісторыка-культурнай спадчыны і іх выкарыстання ў выхаваўчай працы і турыстычнай сферы. Але ў запланаваны тэрмін пасяджэнне рады не прайшло. 16 лістапада 2011 года я накіраваў на імя старшыні камісіі, міністра культуры Паўла Латушкі ліст з просьбай даць інфармацыю па сутнасці аб перспектыўных тэрмінах пасяджэння рады па праблемах аховы аб’ектаў гісторыка-культурнай спадчыны і іх выкарыстання ў выхаваўчай працы і турыстычнай сферы ці прычынах, па якіх запланаванае пасяджэнне не будзе праведзена», — сказаў Астаповіч.

Пісьмовай інфармацыі пра дакладную дату правядзення пасяджэння рады, паводле слоў Астаповіча, дагэтуль няма.

«Пазіцыя старшыні грамадскай рады па справах культуры і мастацтва, міністра культуры Паўла Латушкі па сабатаванні правядзення пасяджэння, якое даўно наспела, падрывае давер грамадскасці да органаў дзяржаўнага кіравання, дыскрэдытуе ідэю дзяржаўна-грамадскага партнёрства ў сферы культуры і, у прыватнасці, у сферы аховы гісторыка-культурнай спадчыны», — лічыць Астаповіч.

«У сувязі з тым, што не выконваецца зацверджаны графік працы савета па справах культуры і мастацтва пры Саўміне, ігнаруецца велізарная колькасць праблем, што існуюць у сферы аховы гісторыка-культурнай спадчыны, дэвальвуецца сама сутнасць існавання такога органа. Я як член рады, як адзін з асноўных аўтараў-складальнікаў праектаў выніковых дакументаў да пасяджэння, прысвечанага праблемам гісторыка-культурнай спадчыны, вымушаны звярнуцца да старшыні Савета міністраў з просьбай разгледзець пытанне аб роспуску гэтай рады ў сувязі з невыкананнем ускладзеных на яго функцый», — заявіў Астаповіч.

Пры гэтым, адзначыў Астаповіч, ён не спадзяецца, што савет будзе распушчаны. «Я спадзяюся, што мой зварот паскорыць правядзенне пасяджэння гэтай рады па пытаннях аховы гісторыка-культурнай спадчыны», — сказаў Астаповіч.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ