Брытанскі суд задаволіў пазоў Ніколы Брукс, якая ў сярэдзіне траўня запатрабавала ад Facebook дадзеныя людзей, якія стварылі ў сацсетцы фальшывы акаўнт і дзейнічалі ад яе імені.
Зламыснікі выкарысталі ўліковы запіс для рассылання паведамленняў непрыстойнага зместу непаўналетнiм дзяўчынкам.
Акрамя таго, 45-гадовая брытанка атрымлівала пагрозы і паведамленні абразлівага характару. Спачатку Брукс звярнулася ў паліцыю, аднак там дапамагчы ёй не змаглі, спаслаўшыся на немагчымасць атрымаць запатрабаваныя дадзеныя.
Жанчына заручылася падтрымкай адваката і накіравала пазоў у Высокі суд Лондана, які абавязаў Facebook падаць IP-адрасыінтэрнэт-троляў. З гэтымі адрасамі яна можа звярнуцца да правайдараў для атрымання падрабязных дадзеных карыстальнікаў, паведамляе The Telegraph.
Атрымаўшы неабходную інфармацыю, Брукс можа падаць у суд на людзей, вінаватых ва ўварванні ў яе асабістае жыццё і нанясенні абразаў.
