З 2013 года ў Беларусі плануецца ўвесці сістэму tax-free 2

З 2013 года ў Беларусі плануецца ўвесці сістэму tax-free. Пра гэта паведаміла намеснік міністра па падатках і зборах Эла Сяліцкая.

«Міністэрства па падатках і зборах прапаноўвае з 2013 года ўвесці новы механізм вяртання ПДК для замежных фізасоб, якія будуць наведваць нашу краіну і вывозіць набытыя ў краіне тавары за мяжу. Гэта так званая сістэма tax-free», — сказала Сяліцкая. Яна адзначыла, што гэтая сістэма актыўна прымяняецца ў еўрапейскіх і прыбалтыйскіх краінах. Такім механізмам таксама зацікавіліся і ў Расіі.

Сяліцкая падкрэсліла, што Беларусь актыўна наведваюць замежныя турысты, якія прыязджаюць, у прыватнасці, на аздараўленне, павялічылася колькасць міжнародных мерапрыемстваў, што праводзяцца ў краіне. У прыватнасці, у 2014 годзе ў Беларусі будзе праведзены чэмпіянат свету па хакеі. «Таму мы адпрацоўваем механізм, каб з 1 студзеня ў Беларусі ўвесці механізм вяртання ПДК для замежных грамадзян», — падкрэсліла Сяліцкая.

Сістэма tax-free — гэта міжнародная праграма кампаніі Global Refund, якая дазваляе атрымліваць грашовае кампенсаванне ПДК, што ўваходзіць у кошт купленага за мяжой тавару. Паслугамі кампаніі штодзённа карыстаюцца звыш 22 тысяч чалавек ва ўсім свеце.

Кожны, хто вяртаецца з-за мяжы з пакупкамі, зробленымі ў магазінах tax-free, мае права на грашовае кампенсаванне сумы падаткаў, выплачанай за набытыя тавары. У сярэднім, у залежнасці ад падатковага заканадаўства краіны знаходжання, сума, якая вяртаецца, складае ад 10 да 20% ад кошту тавару. Гэтыя грошы можна атрымаць пры праходжанні мытнага кантролю, пакідаючы краіну знаходжання.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ